Kizigenza Lionel Messi akijya mu ikipe ya Inter Miami yo muri Leta zunze Ubumwe z’Amerika na bagenzi be Sergio Busquetes na Jordi Alba bose banakinanye mu ikipe ya FC Barcelona ibintu byahise bifata isura nshya. Ikipe yari iyanyuma igaruka mu myanya y’imbere ndetse ibasha no gutwara igikombe.
Ni igikombe cya League Cup tournament aho gihuza amakipe yo muri Leta zunze Ubumwe z’Amerika n’ayo mu bihugu byo muri Amerika y’amajyaruguru nka Canada na Mexico, iyi mikino ikabera muri Leta zunze Ubumwe z’Amerika na Canada. Utwaye iki gikombe cyatangiye gukinwa muri 2019, aba abonye itike yo gukina imikino ya CONCACAF Champions League ni irushanwa ry’amakipe yabaye ayambere iwayo muri Amerika y’amajyaruguru.
Mu ijoro ryakeye nibwo Inter Miami ya Lionel Messi yakinaga umukino wa nyuma na Nashville FC yo muri Leta ya Tennessee. Umukino waje kurangira amakipe yombi anganya 1-1, igitego cya Inter Miami cyatsinzwe na Lionel Messi ku munota wa 23 mu gihe icya Nashville FC cyatsinzwe na Fafà Picault ku munota wa 57. Byabaye ngombwa ko hiyambazwa penaliti.
Muri Penaliti byarangiye Inter Miami itwaye igikombe itsinze penaliti 10-9, Lionel Messi yatsinze iya mbere, Sergio Busquetes atsinda iya kabiri naho Jordi Alba atsinda iya gatandatu. Inter Miami ku nshuro yayo yambere itwara League Cup tournament. Andi makipe yatwaye ho iki gikombe mu nshuro 3 kimaze gukinwa ni Cruz Azul na Léon zose zo muri Mexico.
Nyuma yo gutwara iki gikombe, bidasubirwaho Lionel Messi abaye umukinnyi watwaye ibikombe byinshi mu mateka y’umupira w’amaguru nyuma yo kuzuza icya 44, agakurikirwa na Dani Alves watwaye 43.
Udushya twaranze umukino!
Mbere y’umukino, umukinnyi wa Basketball muri shampiyona ya basketball muri Leta zunze Ubumwe z’Amerika NBA Giánnis Antetokoúnmpo ukinira Milwaukee Bucks yari umwe mu bitabiriye uyu mukino gusa igitangaje ubwo yatsindaga igitego bakina bisanzwe yishimiye mu buryo bwa Cristiano Ronaldo buzwi nka “Siiuu!”.
Akandi gashya nyuma y’umukino byari ibyishimo bikomeye kuri David Beckham nyiri Inter Miami ku bw’igikombe ikipe ye yaribashije kwegukana ndetse yanashimye cyane Lionel Messi. Si we gusa kuko n’abakinnyi bagenzi be Lionel Messi bamushimiye bamuterera hejuru.
Ikipe ya Philadelphia Union niyo yegukanye umwanya wa gatatu itsinze Monterey yo muri Mexico. Lionel Messi yahembwe nk’uwatsinze ibitego byinshi mu irushanwa (top scorer) n’ibitego 10, anahembwa kandi nk’umukinnyi w’irushanwa. Ni intangiriro nziza kuri Lionel Messi.
