Kuri iki cyumweru tariki ya 29 Kanama 2023 nibwo hakinwaga umunsi wa gatatu wa shampiyona y’igihugu y’Ubwongereza Premier League, ni umukino ikipe ya Newcastle United kuri stade yayo ya St James’ Park yari yakiriye ikipe ya Liverpool.
Ku munota wa 25 w’umukino Anthony Gordon wa Newcastle United yateretsemo igitego cya mbere, ibi byazamuye igitutu ku ikipe ya Liverpool. Nyuma y’iki gitego nibwo Virgil Van Dijk kapiteni w’ikipe ya Liverpool ku munota wa 29 yakoreye ikosa rutahizamu wa Newcastle United Alexander Isak, umusifuzi w’umukino John Brooks ntiyashidikanyije gutanga ikarita itukura ako kanya kuri Van Dijk.
N’ubwo ari umukino wari ugiye kugora ikipe ya Liverpool gusa byarangiye ibyitwayemo neza maze itsinda ibitego 2-1, ni ibitego byombi byatsinzwe na Darwin Núñez ku munota wa 81 no ku munota wa 90 bamaze kongeraho iminota 3.
Nyuma y’uko umusifuzi John Brooks ahaye Virgil Van Dijk ikarita itukura, uyu muholandi yagaragaje imyitwarire itari myiza imbere y’umusifuzi nk’uko byemejwe n’abari kuri VAR. Ibirenze ibi, Virgil Van Dijk yanashyamiranye n’umusifuzi wa kane mbere yo gusohoka mu kibuga.
Van Dijk arashinjwa imyitwarire mibi no gukoresha amagambo adahwitse kandi ibi bihanwa n’itegeko ry’akanama k’imyitwarire mu Bwongereza FA risangwa mu ngingo ya E3.1. Kuri uyu wa gatanu tariki ya 1 Nzeri nibwo umwanzuro uzafatwa ku bihano bishobora gufatirwa Van Dijk.
Nk’uko itegeko ribivuga, ikarita itukura myugariro wa Liverpool Van Dijk yahawe ako kanya (Straight red card) izatuma asiba imikino ibiri, gusa mu gihe yafatirwa ibihano bishobora kugera ku yindi mikino 2 hanyuma muri rusange imikino ikaba 4. Bivuze ko ikipe ya Liverpoll ishobora gukina imikino igera kuri 4 idafite myugariro akaba na Kapiteni wayo w’imyaka 32 ukomoka mu Buholandi Virgil Van Dijk.
Imikino ikipe ya Liverpool ikurikizaho muri Premier League ni Aston Villa, Wolves, West Ham United, Tottehnam Hotspur, Brigthon & Hove Albion na Everton.
