Ikipe ya AS Roma yo mu Butaliyani itozwa na Jose Mourinho yaritaratsinda umukino numwe kuva shampiyona y’Ubutaliyani Serie A yatangira ndetse yari mu myanya ya nyuma gusa mu ijoro ryakeye yinyaye mu isunzu maze inyagira ikipe ya Empoli ibitego 7-0. Ni umukino wabaye kuri iki cyumweru kuri stade ya Olimpico ya AS Roma.
Ibitego 7 bya AS Roma byatsinzwe n’abarimo Paulo Dybala watsinze ibitego 2 byo ku munota wa 2 kuri penaliti no ku munota wa 55, Renato Sanches yatsindaga igitego ke cya mbere muri Serie A kuva yava muri PSG, ni igitego yatsinze ku munota wa 8, Alberto Grassi ukinira Empoli mu kibuga hagati yaje kwitsinda igitego ku munota wa 35, Bryan Cristante yatsinze igitego ku munota wa 80, Romelu Lukaku yatsindaga igitego cya mbere muri AS Roma kuva yatizwa muri iyi kipe avuye muri Chelsea, ni igitego yatsinze ku munota wa 82 hanyuma Gianluca Mancini nawe atsinda igiitego ku munota wa 86 anuzuza ibitego 7 bya AS Roma.
Uyu mukino wabonetsemo ibitego bingana bitya ukaba wahise usiga imwe mu mibare muri Serie A. Imwe muri iyo mibare ni iyi ikurikira:
- Kuva mu 1994 Serie A yakwemeza ko ikipe itsinze umukino itwara amanota 3, uyu ubaye umukino wa 9 urangiye ikipe imwe itsinze indi ibitego 7-0. Imwe kandi mu nshuro 8 zaherukaga harimo iyo AS Roma n’ubundi yatsinze Catania ubwo yatozwaga na Luciano Spalletti muri 2006.
- Ntayindi kipe yo mu Butaliyani irabasha kurenza ibitego 7 mu mukino umwe kuva mu 1961 ubwo ikipe ya Juventus yanyagiraga Inter Milan ibitego 9-1. AS Roma yigeze gutsinda ibitego 8-0 ikipe ya Napoli mu 1959 ndetse yanatsinze ikipe ya Cremonese ibitego 9-0 mu 1929 gusa agahigo ko gutsinda ibitego byinshi muri Serie A karakihariwe n’ikipe ya Torino ubwo yatsindaga ikipe ya Alessandria ibitego 10-0 hari mu 1948.
- Umutoza ukomoka muri Portugal utoza AS Roma Jose Mourinho yaherukaga gutsinda ikipe ayinyagiye umuba w’ibitego muri 2011, icyo gihe yatsinze ikipe ya Almeria ibitego 8-1 ubwo yatozaga ikipe ya Real Madrid.
Bakinaga umunsi wa 4 muri Serie A, ikipe ya AS Roma yaritaratsinda umukino n’umwe, yari yaratsinzwe imikino 2, inganya umukino 1 naho Empoli ntiratsinda umukino numwe, imikino yose yaherukaga n’ubundi yarayitsinzwe.
Nyuma y’umukino ikipe ya AS Roma yahise iva ku mwanya wa 18 maze ijya ku mwanya wa 12 n’amanota 4, yizigamye ibitego 5 naho ikipe ya Empoli yagumye ku mwanya wa nyuma n’umwenda w’ibitego 12, ntirinjiza igitego na kimwe ndetse ntanota na rimwe ifite.
