Jerome Boateng ni myugariro ukomoka muri Ghana gusa wakiniye ikipe y’igihugu y’Ubudage w’imyaka 35 y’amavuko. Uyu mugabo nyuma yo gutandukana na Lyon yo mu Bufaransa ashobora kugaruka muri Bayern Munich yamazemo imyaka 10.

Boateng yatangiye gukina umupira w’amaguru nk’uwabigize umwuga muri 2006 ubwo yakiniraga ikipe ya Hertha Berlin yo mu Budage yanamazemo umwaka umwe, mu mwaka wa 2007 yahise yerekeza muri Hamburg SV yo mu Budage ubundi 2010 yerekeza muri Manchester City mu gihugu cy’Ubwongereza.

Muri 2011 nibwo Jerome Boateng yavuye muri Manchester City yerekeza muri Bayern Munich aho yakinnye kugeza muri 2021 mu gihe k’imyaka 10 yose ni mbere yo kwerekeza muri Olympique Lyonnais yo mu Bufaransa aheruka gutandukana nayo.

Mu myaka 10 Boateng yamaze muri Bayern Munich yayikiniye imikino 363 ayitsindira ibitego 10. Yatwaranye nayo ibikombe 2 bya UEFA Champions League, ibikombe 9 bya shampiyona, ibikombe 2 bya UEFA Super Cup, ibikombe 2 bya FIFA Club Wold Cup, ibikombe by’igihugu 5 n’ibikombe 5 by’igikombe kiruta ibindi mu Budage.

Amakuru dukesha umuhanga mu isoko ry’igura n’igurisha ry’abakinnyi ku mugabane w’Iburayi Fabrizio Romano avuga ko ikipe ya Bayern Munich yamaze kumvikana na Jerome Boateng utari ufite ikipe ngo abe yagaruka muri Bayern Munich aze gutanga ubufasha muri iyi kipe nk’umukinnyi wahahoze.

Amakuru avuga ko Boateng yanamaze gukora isuzuma ry’ubuzima muri Bayer Munich, akaba agomba gusinya muri iyi kipe amasezerano y’igihe gito.

Uretse Bayern Munich yo mu Budage na Real Madrid yo muri Espagne nayo yifuzaga uyu mukinnyi gusa bisa nkaho yiyemereye gusubira aho yahoze.