Ni umunsi wa mbere wa shampiyona y’igihugu y’Ubwongereza mu mupira w’amaguru Premier League wakomezaga kuri uyu munsi. Ni umunsi wabimburiwe n’ikipe y’Arsenal kuri stade yayo ya Emirates Stadium aho yakiraga ikipe ya Nottingham Forest. Byari biteganyijwe ko umukino utangira saa 13:30 gusa biza kurangira umukino ukereweho iminota 30 kuko watangiye saa 14:00 byatewe n’ikibazo cya sisitemu ikata amatike yagize ikibazo bituma abafana batinjirira ku gihe. Ibi ariko ntibyabujije ikipe y’Arsenal kwitwara neza kuko yaje gutsinda ibitego 2-1 ni ibitego by’Arsenal byatsinzwe na Edouard Nketiah ku munota wa 26 ndetse ku munota wa 32 ku ishoti rikomeye rya Bukayo Saka ikipe y’Arsenal ibona igitego cya kabiri.
Ikipe ya Nottingham Forest nayo yaje kubona igitego ku munota wa 82 cya rutahizamu ukomoka muri Nigeria Taiwo Awoniyi ndetse umukino urangira utyo ari ibitego 2-1, Arsenal babatije inzovu ibonye amanota 3 yambere.
Ni umukino utagaragayemo abakinnyi barimo Balogun, Zinchenko, Nicolas Pepe, Sambi Lokonga, Gabriel Jesus, Mohamed Elneny ku ruhande rw’Arsenal kubera ibibazo by’imvune. N’ubwo Arsenal yatsinze ariko yanavunikishije myugariro wayo wavuye mu ikipe ya Ajax Amsterdam Jurrien Timber n’ubwo umutoza w’Arsenal Mikel Arteta yavuze ko atari imvune ikomeye nyuma yo gusuzumwa n’abaganga.
Mu yindi mikino yakinwaga AFC Bournemouth yanganyije na West Ham United igitego 1-1, Brighton & Hove Albion yatsinze Luton Town izamutse uyu mwaka ibitego 4-1, Everton itsindwa na Fulham 1-0, Sheffield United itsindwa na Crystal Palace 1-0 mu gihe umukino wafunze indi kuri uyu munsi ari uwahuje Newcastle United na Aston Villa aho wo warangiye ikipe ya Newcastle United iyinyagiye ibitego 5-1.
Imikino ya Premier League izakomeza ku munsi w’ejo ku i saa 15:00 ikipe ya Brentford ikina na Tottenham Hotspur naho ku i saa 17:30 ikipe ya Chelsea yakire ikipe ya Liverpool ari nawo mukino utegerejwe na benshi.
