Kuri uyu wa kabiri ikipe ya Rayon Sports igomba guhaguruka i Kigali yerekeza muri Libya mu mugi wa Benghazi gukina umukino ubanza w’ijonjora rya kabiri rya CAF Confederations Cup n’ikipe ya Al Hilal Benghazi gusa bitunguranye iyi kipe irahaguruka itarikumwe n’umusore ukomoka muri Maroc Youssef Rharb.
Kuri uyu wa mbere nibwo ikipe ya Rayon Sports yatangaje urutonde rw’abakinnyi 22 bagomba guhaguruka mu Rwanda berekeza muri Libya gukina na Al Hilal Benghazi. Bitunguranye ariko umunya-Maroc Youssef Rhab yamaze kuva kuri urwo rutonde, bikavugwa ko ari ukubera ikibazo k’imvune yagiriye ku mukino wo ku wa gatanu ubwo iyi kipe yatsindaga Kiyovu Sports ibitego 3-0 ku mukino wa nyuma wa RNIT Saving Cup, ni umukino wabereye kuri Kigali Pele Stadium.
N’ubwo impamvu nyamukuru yatumye Youssef Rhab asigara bivugwa ko ari imvune hari andi makuru ahabanye n’ibi, gusa kuri ubu impamvu nyamukuru ivugwa ni imvune. Ni igihombo ku ikipe ya Rayon Sports cyane ku uyu musore asanzwe ayifasha mu mikinire yayo.
Urugendo rwa Rayon Sports rukaba rutangirira i Kigali ku kibuga k’indege mpuzamahanga i Kanombe saa 16:25, ikazahagarara i Addis Ababa muri Ethiopia, igakomereza i Cairo mu Misiri ubundi ikabona gufata urugendo yerekeza ku kibuga k’indege cya Benina International Aiport giherereye i Benghazi muri Libya. Biteganyijwe ko Rayon Sports izagera muri Libya kuri uyu wa gatatu saa 10:25 za mu gitondo.
Mu bakinnyi Rayon Sports ihagurukana harimo abazamu 3 aribo HAKIZIMANA Adolphe, HATEGEKIMANA Bohneur na TAMALE Simon, ba myugariro 6 aribo kapiteni RWATUBYAYE Abdul, GANIJURU ISHIMWE Elie, MITIMA Isaac, MUCYO Didier Junior, NSABIMANA Aimable na SERUMOGO Ali, irahagurukana kandi abakinnyi bo mu kibuga hagati 6 aribo MADJALIWA ARUNA Musa, BAVAKURE NDEKWE Felix, MVUYEKURE Emmanuel, NGENDAHIMANA Eric, KALISA Rashid na LUVUMBU Heritier Nzinga, ba rutahizamu ni TUYISENGE Arsene, BAALE Charles, Eid Mugadam abakar Mugadam, Musa Essenu, IRAGUHA Hadji na Joackiam Ojera.
Iyi kipe ikazagenda iyobowe n’umutoza Yamen Zelfani, Mohamed Wade nk’umutoza wungirije, Kawalya Samuel Mujabi nk’umutoza w’abazamu, Lebitsa Ayabonga nk’umutoza wa fitness, NSHIMIYIMANA Claude nka team physiotherapist, NIZEYIMANA Shafi nka kit manager, UMURERWA Delphine nka gafotozi, NGABO Roben nk’ushinzwe itumanaho na MUJYANAMA Fidele umushumba wabo bose (team manager).
Umwanya wa Youssef Rhab ukaba wahise uhabwa MUGISHA Francois bakunze kwita Master ubundi utari ku rutonde. Bamwe mu bakinnyi ba Rayon Sports basigaye harimo RUDASINGWA Prince, BUGINGO Hakim na Pascal bakunze kwita Messi.
Mbere yo guhaguruka ikipe ya Rayon Sports ikaba yabanje gukora imyitozo ku kibuga cya Skol mu Nzove yatangiye saa 07:00 za mu gitondo.
Umukino ubanza uzabera i Benghazi ukaba uzakinwa tariki ya 15 Nzeri 2023 saa 20:00 z’umugoroba ni ku munsi wo ku wa gatanu.
