Ikipe ya Rayon Sports yahagurutse i Kigali kuri uyu wa kabiri yerekeza muri Libya, yamaze kugerayo aho igiye gukina n’ikipe ya Al Hilal mu ijonjora rya kabiri rya CAF Confederations Cup, ni umukino wari utegerejwe ku munsi wo ku wa gatanu tariki ya 15 Nzeri 2022.
Bitewe n’ibiza byibasiye igihugu cya Libya byatumye ikipe ya Al Hilal yandikira ishyirahamwe ry’umupira w’amaguru muri Afurika CAF isaba ko umukino wayo na Rayon Sports wakwimurwa kuko muri iki gihugu bakiri mu gahinda kababuriye ubuzima muri ibi biza tutibagiwe n’ubutabazi bugikomeje gukorwa.
Kuri uyu wa gatatu ubwo ikipe ya Rayon Sports yarikiri mu rugendo yerekeza muri Libya nibwo ibihuha byabaye byinshi bivugwa ko umukino wa Rayon Sports na Al Hilal Benghazi waba wimuriwe mu cyumweru gitaha kuko CAF yemeye ubusabe bwa Al Hilal.
Byasabye ko Rayon Sports ikandagiza ikirenge i Benghazi muri Libya ngo hasobanuke neza iby’uyu mukino warutegerejwe ku wa gatanu. Bakigera i Benghazi ubuyobozi bwa Rayon Sports buyobowe na UWAYEZU Jean Fidele bwakoranye inama n’ubuyobozi bw’ikipe ya Al Hilal Benghazi.
Mu myanzuro yavuye muri iyi nama ni uko ikipe ya Al Hilal Benghazi yasabye ikipe ya Rayon Sports ko imikino yose ubanza n’uwo kwishyura yazakinirwa i Kigali mu Rwanda nk’uko Perezida wa Rayon Sports UWAYEZU Jean Fidele yabitangarije igitangazamakuru cya B&B FM Umwezi cya hano mu Rwanda.
Kuri ubu amakuru ahari kandi y’impamo ni uko umukino wa Al Hila Benghazi na Rayon sports utakibaye kuri uyu wa gatanu, ndetse imikino yombi ikaba (ubanza n’uwo kwishyura) izakinirwa mu Rwanda hanyuma CAF ikazagenga amatariki iyi mikino yombi izakinirwaho.
