Tariki ya 5 Kanama 2023 nibwo habaye umunsi w’Igikundiro. Uyu ni umunsi ikipe ya Rayon Sports imaze kumenyereza abakunzi bayo kuko ari ngarukamwaka. Kuri uyu munsi ikipe ya Rayon Sports imurikira abafana bayo abakinnyi izakoresha mu mwaka w’imikino uba ugiye kuza ndetse hakaba n’umukino wa gishuti uhuza Rayon Sports n’indi kipe iba yatumiwe, kuri iyi nshuro yakinnye n’ikipe ya Kenya Police FC yo muri Kenya aho umukino warangiye Kenya Police FC itsinze Rayon Sports izwi ku mabara y’ubururu n’umweru igitego 1-0.
Ku munsi w’Igikundiro Rayon Sports yatangarije abafana bayo ko hari igifaru bamaze kumvikana ndetse iyo ntwaro nshya yaje gutangazwa na Rayon Sports ko ari umwataka w’umunyasudani uturutse mu ikipe y’iwabo muri Sudan ya Al Hilal club yanatwaye igikombe cya Shampiyona yo muri Sudan, uwo ni uwitwa Eid Mugadam Abakar Mugadam w’imyaka 23.
Uyu mukinnyi akaba akina asatira izamu aciye ku ruhande (winger), akaba yamaze gufata rutemikirere imuvana muri Sudan imuzana hano mu Rwanda mu masaha ya mu gitondo y’uyu munsi wa mbere w’icyumweru, akaba aje mu Rwanda gukinira ikipe ya Rayon Sports.
Eid Mugadam asanze ikipe ya Rayon Sports mu byishimo byo gutwara igikombe kiruta hano mu Rwanda FERWAF Super Cup nyuma yo kwandagaza mukeba wayo APR FC iyitsinda ibitego 3-0. Uyu mukinnyi akaba aje gufasha ikipe ya Rayon Sports mu busatirizi bwayo aho ifite n’umukino wa shampiyona ku wa gatanu tariki 18 Kanama 2023 aho izakirwa na Gasogi United ndetse iri no kwitegura imikino nyafurika aho izahagararira u Rwanda muri CAF Confederations Cup.
