IMIKINO: IBIRURA BYARI BIBAYE IBIRURA IMBERE YA MANCHESTER UNITED, BISABYE MYUGARIRO

Ni umunsi wa mbere wa shampiyona y’ikiciro cya mbere mu mupira w’amaguru mu Bwongereza Premier League. Iyi shampiyona ibamo amakipe 20 ubwo bivuze ko buri munsi wa shampiyona (journee) hakinwa imikino 10.

Umunsi wa mbere w’iyi shampiyona watangiye ku munsi wo ku wa gatanu, imikino ikomeza ku wa gatandatu no ku cyumweru. Hari hasigaye umukino umwe wagombaga kuba kuri uyu wa mbere saa 21:00 za hano mu Rwanda.

Umukino warusigaye ni uw’ikipe ya Manchester United kuri stade yayo Old Trafford yakiraga ikipe ya Wolverhamton Wanderers bakunze kwita Wolves cyangwa se ibirura.

Umutoza Erik Ten Hag wa Manchester United yari yabanje mu kibuga abakinnyi aherutse kugura barimo André Onana mu izamu na Mason Mount mu kibuga hagati. Igice cya mbere cyarangiye amakipe yombi anganya 0-0.

Mu gice cya kabiri cy’umukino amakipe yombi yagerageje gushaka igitego ariko biranga ari nako akora impinduka. Ku munota wa 76 nibwo umwongereza w’umukongomani Aaron Wan-Bissaka yagaruye neza umupira muri penaliti usanga myugariro Raphaël Varane ahagaze neza aba atsinze igitego cy’umutwe, biba bibaye igitego 1-0.

Umutoza mushya wa Wolverhamton Wanderers Gary O’Neil yakoze impinduka ngo arebe ko yakwishyura ariko biranga kuko umuzamu wa Manchester United n’ubwugarizi bwayo bwamubereye ibamba, umukino uza kurangira ari igitego kimwe cya Manchester United ku busa bwa Wolverhamton Wanderers. Bigoranye Manchester United iraza abafana bayo neza cyane ko n’umuzamu André Onana wa Manchester United ariwe wagizwe umukinnyi mwiza w’umukino (Man of the match).

Nyuma ya Wolverhamton Wanderers, Manchester United izakurikizaho kujya gusura ikipe ya Tottenham Hotspur ku wa 19 Kanama 2023, i saa 18:30 za hano i Kigali. Ni umukino uzabera kuri stade Tottenham Hotspur Stadium.

Kuri ubu amakipe yose yamaze gukina umukino umwe, ku rutonde rw’agateganyo ikipe ya Newcastle United irayoboye, Brighton & Hove Albion ni iya kabiri, Manchester City ni iya gatatu, Arsenal ni iya kane. Manchester United iri ku mwanya wa 7, Chelsea ku mwanya wa 11 naho Liverpool iri ku mwanya wa 12.