Umwongereza Harry Kane yatsindiye ikipe ye ya Bayern Munich ibitego 3 mu mukino umwe ibizwi nka Hat-trick bwa mbere kuva yagera muri iyi kipe avuye muri Tottenham Hotspur.
Mu mukino w’umunsi wa 5 wa shampiyona y’Ubudage Bundesliga ikipe ya Bayern Munich yari yakiriye Vfl Bochum 1848 kuri stade yayo Allianz Arena, ni umukino warangiye Bayern Munich itsinze ibitego bihera kuri 7-0 harimo ibitego 3 bya Harry Kane.
Harry Kane yinjiye mu ikipe ya Bayern Munich muri iyi mpeshyi nyuma yo kugurwa agera kuri miliyoni £104, yaje muri iyi kipe nk’igisubizo cya rutahizamu ndetse akomeje kubigaragaza.
N’ubwo kapiteni w’ikipe y’igihugu y’Ubwongereza Harry Kane w’imyaka 30 yatsinze ibitego 3 mu mukino ariko ibi ntibyanditswe ko yabashije gutsinda hat-trick kuko atabashije guhuza n’itegeko ryihariye riba mu Budage.
Mu itegeko ryo mu Budage bavuga ko kugira ngo wandikwe nk’uwatsinze hat-trick ugomba gutsinda ibitego 3 byose mu gice kimwe kandi bikaza bikurikirana ntawundi mukinnyi utsinze hagati y’igitego kimwe n’ikindi.
Ibi Harry Kane ntiyabyujuje kuko yatsinze igitego cya mbere ku munota wa 12 w’igice cya mbere ubundi ibindi bitego 2 abitsinda mu gice cya kabiri ku munota wa 54 na 88. Ikindi ibitego bye ntabwo byaje bikurikirana ahubwo hanyuzemo abandi bakinnyi baratsinda kuko Harry Kane yatsinze igitego cya 2, icya 5 n’icya 7.
Ibi ariko ntibyabujije ko Harry Kane atahana umupira unasinyeho nk’uwabashije gutsinda ibitego 3 mu mukino umwe ndetse yagaragaje ko abyishimiye abinyuza ku rukuta rwe rwa X (Twitter) aho yagize ati, “Igihembo gishya, mbega kwitwara neza kw’ikipe.”
Nyuma y’iyi nsinzi, Bayern Munich yahise iyobora urutonde rw’agateganyo rwa Bundesliga n’amanota 13 yizigamye ibitego 14, ikurikirwa na Stuttgart, Leipzig na Hoffenheim zose zifite amanota 12, ubundi hakaza Borussia Dortmund ku mwanya wa 5 n’amanota 11 aho ikurikirwa na Bayer Leverkusen ifite amanota 10.
Darmstadt na Mainz nizo kipe 2 za nyuma zifite inota rimwe n’umwenda w’ibitego 10 nyuma y’iminsi 5 ya shampiyona.
