Igikombe k’isi cy’abari n’abategarugori mu mupira w’amaguru cyari kiri kubera muri Australia na New Zealand cyageze ku musozo. Ku munsi w’ejo nibwo ikipe y’igihugu ya Suede yegukanye umwanya wa gatatu nyuma yo gutsinda ikipe y’igihugu ya Australia ibitego 2-0. Kuri uyu munsi nibwo hagombaga gusozwa ku mugaragaro iki gikombe hakinwa umukino wa nyuma.
Umukino wa nyuma wagezweho n’ikipe y’igihugu ya Espagne n’ikipe y’igihugu y’Ubwongereza. Aya makipe yombi ni ubwambere yarageze ku mukino wa nyuma w’iki gikombe mu mateka yayo. Ni umukino wakiniwe kuri Australia stadium muri Australia mu mugi wa Sydney.
Umukino watangiye impande zombi zishaka uko zabona igitego gusa ku munota wa 29 myugariro wa Espagne wari kapiteni Olga Carmona usanzwe ukinira Real Madrid, ku mupira yarahawe neza na Maria Caldentey aba ateretsemo igitego cya mbere ku ruhande rw’ikipe ya Espagne. Ubwongereza bwagerageje kwishyura ari nako Espagne ireba uko yabona igitego cya kabiri gusa iminota 90 y’umukino yaje kurangira igitego kimwe aricyo gitandukanyije izi mpande zombi.
Espagne iba itwaye igikombe k’isi cya mbere mu mateka yayo mu bari n’abategarugori, yiyongera ku rutonde rw’amakipe amaze gutwara iki gikombe mu mateka yayo ariyo Leta Zunze Ubumwe z’Amerika yatwaye ibikombe 4, Ubudage bwatwaye 2 na Norway n’Ubuyapani batwaye kimwe.
Umuyapani Hinata Miyazawa niwe watsinze ibitego byinshi kurusha abandi muri iri rushanwa nyuma yo gutsinda ibitego 5, umunya-Espagne Aitana Bonmati niwe wabaye umukinnyi w’irushanwa, umunya-Espagne Salma Paralluelo aba umukinnyi mwiza ukiri muto naho umuzamu w’umwongereza Mary Earps. Umunya-Espagne Alexia Putellas ufite igihembo cya Ballon d’or giheruka ntiyigeza ahirwa n’iki gikombe ku buryo no ku mukino wa nyuma yaje mu kibuga asimbuye.
Espagne yegukanye iki gikombe ikaba yahawe miliyoni $10.5 ni arenga miliyari 10 z’amanyarwanda naho Ubwongereza bwabaye ubwa kabiri bwahawe miliyoni $7.5 ubwo ni arenga miliyari 7 z’amanyarwanda.
