Bayern München ni ikipe yo mu Budage. Iyi kipe irakomeye cyane haba mu Budage no mu Burayi muri rusange. Kuri ubu Bayern München imaze gutwara ibikombe 83 muri rusange harimo 33 bya shampiyona ndetse 11 muri byo birakurikirana, harimo kandi ibikombe by’amakipe yabaye ayambere iwayo ku mugabane w’Iburayi UEFA Champions League 6 ndetse n’ibindi. Kubijyanye n’abakinnyi Bayern München ntawayinenga ndetse yanongeyemo abandi, ikibazo cyagaragaraga ifite cyari icya rutahizamu none kuri ubu nawe yamwibitseho ariwe Harry Kane, umwe mu beza bariho ubu. Ahubwo abenshi basigara babona ikibazo ku mutoza.
Bayern München mu mwaka ushize w’imikino wa 2022/23 yatozwaga na Julian Nagelsmann w’imyaka 35 hamwe n’uyu mutoza, iyi kipe yageze muri 1/4 k’irangiza k’igikombe k’igihugu DFB Pokal, igera muri 1/2 cya UEFA Champions League naho muri shampiyona yari iya kabiri irushanwa inota rimwe na Borussia Dortmund yari iyambere. Bitunguranye tariki ya 24 Werurwe iyi kipe yasohoye itangazo ivuga ko yirukanye umutoza Julian Nagelsmann ko ahubwo yazanye Thomas Tuchel w’imyaka 49. Ku bigwi aba batoza ntiwabagereranya cyane ko Thomas Tuchel yanyuze mu makipe nka Borussia Dortmund, Paris Saint Germain na Chelsea ndetse yatwaye UEFA Champions League ubwo yari muri Chelsea, anagera ku mukino wanyuma wayo ubwo yari muri Paris Saint Germain. Bamwe bavugaga ko iyi kipe ihubutse cyane ko yari ifite umukino wo kwishyura wa UEFA Champions League yagombaga gukinamo na Manchester City yo mu Bwongereza, umukino ubanza yari yatsinzwe ibitego 3-0 ubwo bari mu Bwongereza, gusa abandi bagahamya ko umwanzuro w’iyi kipe ntacyo utwaye. Dore ibyabaye rero nyuma yo kuzana Thomas Tuchel nuri Bayern München.
Ku ikubitiro Bayern München yavanywemo na Manchester City muri UEFA Champions League, ivanwamo na SC Freiburg muri DFB Pokal, n’igikombe cya Shampiyona igitwara ku mukino wanyuma kuko Borussia Dortmund yananiwe gutsinda umukino wayo gusa iyo iwutsinda niyo yari kwegukana iki gikombe. Iyi kipe mu mikino ya gishuti ntiyitwaye neza ndetse yanatsinzwe ku mukino w’igikombe kiruta ibindi mu Budage DFL Super Cup, aho yatsinzwe ibitego 3-0 n’ikipe ya RB Leipzig, kugeza aha ubushobozi bw’umutoza ntibwabura gukemangwa.
Thomas Tuchel yaje muri iyi kipe ngo arusheho kuyikomeza ahubwo ubona ko yarushijeho kutaba nziza. Tuchel w’imyaka 49 amaze gutoza Bayern München imikino 13, muri yo yatsinze 6, atsindwa 5 anganya 2, ni imibare itari myiza ku ikipe nka Bayern München iba ifite abakinnyi bakomeye ndetse isanzwe ari ubukombe. Ubu ikibazo kibazwa n’abasesenguzi b’umupira ni ese ahabwe andi mahirwe? Ese umutoza niwe kibazo cyangwa ni abakinnyi batamubanira?
