Umubiligi w’imyaka 32 y’amavuko Eden Hazard nyuma yo kudahirwa muri Real Madrid kuri ubu akaba ntakipe afite ngo yaba yenda gusezera ku gukina umupira w’amaguru nk’uwabigize umwuga.
Muri 2019 nibwo ikipe ya Real Madrid yatanze miliyoni €150 iziha ikipe ya Chelsea kuri Eden Hazard. Uyu musore yari aje kuba inyenyeri mu ikipe ya Real Madrid gusa siko byagenze kuko yagowe cyane n’imvune mu gihe k’imyaka 4 yahamaze kugeza muri uyu mwaka ubwo impande zombi zemeranyaga gusesa amasezerano.
Mu myaka 4 Eden Hazard yamaze muri Real Madrid yo muri Espagne yayikiniye imikino 76 mu marushanwa yose, ayitsindira ibitego 7, atanga imipira yavuyemo ibitego 12. Mu ikipe ya Chelsea yaravuyemo mu Bwongereza yahamaze imyaka 7, ayikinira imikino 352, ayitsindira ibitego 110, atanga imipira 92 yavuyemo ibitego.
Nyuma yo gutandukana na Real Madrid, rutahizamu Eden Hazard yifujwe n’amakipe menshi arimo OGC Nice, Olympique de Marseille na LOSC Lille zo mu Bufaransa, Botafogo yo muri Brazil, Al-Hilal yo muri Saudi Arabia n’amakipe yo muri Leta Zunze Ubumwe z’Amerika gusa aya makipe yose yarayahakaniye.
Amakuru dukesha ikinyamakuru Foot Mercato cyo mu Bufaransa kivuga ko Eden Hazard yaba ari mu nzira zo gusezera ku gukina ruhago nk’uwabigize umwuga cyane ko yamaze gusezera mu ikipe y’igihugu y’Ububiligi ndetse kuri ubu akaba ntakipe yemera gukinira.
