Rutahizamu w’imyaka 38 y’amavuko ukomoka muri Portugal ukinira ikipe ya Al Nassr yo muri Saudi Arabia Cristiano Ronaldo dos Santos Aveiro yujuje ibitego 850 yatsinze, akomeza agahigo ko kuba uwa mbere mu mateka y’umupira w’amaguru.
Mu mukino ikipe wa shampiyona y’umupira w’amaguru muri Saudi Arabia Saudi Pro League ikipe ya Al Hazm yari yakiriye Al Nassr ku munsi wa 5 wa shampiyona warangiye Al Nassr itsinze ibitego 5-1. Mu bitego 5 bya Al Nassr harimo kimwe cya Cristiano Ronaldo cyo ku munota wa 68, iki cyatume yuzuza ibitego 850.
Muri uyu mukino kandi Cristiano Ronaldo yatanze imipira ibiri yavuyemo ibitego. Umunya-Senegal bakinana Sadio Mane nawe yabonye igitego ku munota wa 78.
Cristiano Ronaldo abaye umukinnyi wa mbere mu mateka y’umupira w’amaguru wujuje ibitego 850 ndetse niwe watsinze ibitego byinshi mu mateka. Ni ibitego yatsinze mu mikino 1177. Ku rutonde akurikirwa na Lionel Messi watsinze 818, Josef Bican watsinze 805, Pelé watsinze 765 na Romario watsinze 753, abandi baza bakurikira. Muri aba bose Cristiano na Messi nibo bagikina gusa.
Cristiano Ronaldo yatsinze ibitego mu ikipe y’igihugu ya Portugal n’amakipe arimo Sporting CP, Manchester United, Real Madrid, Juventus de Turin na Al Nassr akinira kuri ubu.
Cristiano Ronaldo yatangiye gukina mu ikipe nkuru mu mwaka w’imikino wa 2002/23 ubwo yakiniraga ikipe ya Sporting CP y’iwabo. Mu byumvikana Cristiano Ronaldo ureshya nka metero 1.87 ukina nka rutahizamu akaba amaze imyaka 20 akina nk’uwabigize umwuga.
