Al Nass yo muri Saudi Arabia ishobora gukina umukino wa gishuti na Inter Miami ibi byatuma abakunzi b’umupira w’amaguru bongera kubona ba kizigenza babiri mu mupira w’iki kinyejana Cristiano Ronaldo na Lionel Messi bongera kujya mu kibuga kimwe.
Ikigo k’isoko mpuzamahanga cy’Ubushinwa (Chinese international marketing firm) ngo kiteguye kwakira umukino wa gishuti hagati y’ikipe ya Al Nassr ya Cristiano Ronaldo na Inter Miami ya Lionel Messi nk’uko tubikesha ikinyamakuru Al Bilad Daily cyo muri Saudi Arabia. Ni mu mikino ya gishuti iteganyijwe kubera mu Bushinwa muri Mutarama 2024.
N’ubwo bitaremezwa ngo gusa ikipe ya Al Nassr yamaze kwakira ubutumire buvuye mu Bushinwa ibi biganisha ku kuba igomba guhurirayo na Inter Miami nayo iteganyijwe kuba iriyo. Si Inter Miami gusa kandi Al Nassr izakina nayo kuko ahubwo biteganyijwe ko izanakina na Manchester City yo mu Bwongereza.
Ntawahwema guhamya ko Cristiano Ronaldo na Lionel Messi ari bamwe mu bakinnyi babayeho beza mu mateka y’umupira w’amaguru ariko kandi byumwihariko mu myaka iheruka.
Ubwo aba bombi baheruka guhurira mu kibuga kimwe hari tariki ya 19 Mutarama 2023 ubwo ikipe ya Paris Saint Germain Lionel Messi yakiniraga yakinnye umukino wa gishuti n’ikipe nziza ya shampiyona ya Saudi Arabia (Saudi Pro League All Star) ni nyuma y’uko Cristiano Ronaldo yaramaze kwerekeza muri Al Nassr.
