Mu gihe ikipe ya APR FC iri kwitegura imikino y’ijonjora rya kabiri rya CAF Champions League aho igomba kwakira ikipe ya Pyramids FC yo mu Misiri kuri iki cyumweru tariki 17 Nzeri 2023 chairman w’iyi kipe Lt Col KARASIRA Richard yagiranye ikiganiro n’itangazamakuru kuri uyu wa gatatu aho yatangaje amakuru atandukanye kuri iyi kipe.
Zimwe mu ngingo Lt Col KARASIRA yagarutseho; yavuze ku bakoze ba APR FC bafunzwe aho bakurikiranyweho icyaha gifitanye n’amarozi, yagarutse kandi k’uko ikipe ya APR FC yiteguye umukino wa CAF Champions League ifitanye na Pyramids FC, yagarutse ku bibazo APR FC ifitanye n’umutoza wayihozemo ukomoka muri Maroc Adil Erradi Mohammed, yavuze kandi kubijyanye n’imyambaro y’iyi kipe, ntiyibagiwe kandi kuvuga ku bijyanye n’ikoreshwa ry’imbugankoranyambaga z’iyi kipe.
Lt Col KARASIRA agaruka ku mwuka uri mu ikipe ya APR FC yavuze ko ari mwiza ndetse binagaragara nko mu gihe abakinnyi bishimira igitego. Yavuze ko abakuru bafata abato nka barumuna babo ndetse ko n’ubwo abakinnyi bose batavuga ururimi rumwe gusa bitababuza gusabana no gusangira. Yavuze kandi ko ari iby’agaciro kuba ikipe ya APR FC ifite abakinnyi ba banyamahanga kandi bafite ubunararibonye.
Yakomeje avuga ko intego yo kugura abanyamahanga kwari ukugira ngo bazegukane buri gikombe cyose bazahatanira ndetse ashomangira ko gutwara shampiyona y’uyu mwaka. Mu magambo ye Lt Col KARASIRA yagize ati,”Ikizere cyo gutwara shampiyona kirenze 100%” ndetse ko kubijyanye n’imikino nyafurika gahunda ari ugukuramo Pyramids FC.
Kubijyanye n’imyenda aho abafana b’iyi kipe bakomeza gutaka ko itabitaho nk’uko mukeba wabo Rayon Sports yabigenje, Lt Col KARASIRA yavuze ko hari kompanyi zikora imyenda zavuganye n’ikipe ya APR FC ngo zizajye zambika abafana bayo hanyuma nazo zibamamarize, yemeye neza ko ari ikibazo kuba abafana batagira imyambaro ibaranga ndetse abisabira imbabazi gusa avuga ko ari ikibazo kiravugutirwa umuti vuba bidatinze.
Agaruka ku ntego z’ikipe ya APR FC Lt Col KARASIRA yagize ati,”Nk’umuyobozi w’ikipe nakwishimira kubona umuntu akuyemo Pyramids mu marushanwa nyafurika” yakomeje avuga ko ikipe ya APR FC yifuza kubaka ikibuga cy’ubwatsi bw’ubukorano n’icy’ubwatsi busanzwe ndetse ko ibyo byose biri muri gahunda.
Ku bijyanye n’ikibazo APR FC yarifitanye n’uwahoze ari umutoza wayo Adil Errid Mohammed aho yayireze ayishinja ko yamwirukanye binyuranyije n’amategeko Lt Col KARASIRA yagize ati,”Twaramutsinze, yarajuriye. Ubu twembi turi mu rwego rw’ubujurire”
Agaruka ku mbugankoranyambaga za APR FC Lt Col KARASIRA yashimagije cyane ikipe ya Rayon Sports avuga ko yateye intambwe mu gukoresha imbugankoranyambaga neza gusa yemera ko APR FC ikibifitemo intege nke gusa yemeza ko bigomba gukosoka.
Lt Col KARASIRA Richard yabajijwe kubijyanye n’amakuru avuga ko ikipe ya APR FC yaba yifuza gukina irushanwa rishya ryo ku mugabane w’Afurika rya Super League, mu magambo ye yagize ati,”Super League ntawutakifuza kuyijyamo. Tubifite muri gahunda ariko tukajyamo tubikwiriye. Tugomba kuyijyamo uko byagenda kose kuko ni imwe mu ntego twihaye nk’ikipe” Ibi binajyana n’uko iri rushanwa umwaka utaha rizaba rikinirwa mu Rwanda.
Kimwe benshi mu byo benshi bari bategereje kumva ni ibijyanye n’abakozi ba APR FC bivugwa ko batawe muri yombi bazira ibyaha bifitanye isano n’amarozi, kuri iyi ngingo Lt Col KARASIRA Richard chairman w’ikipe ya ARP FC yemeje ko koko hari abakozi bayo bafunze ndetse bakurikiranyweho ibyaha bifitanye isano n’amarozi aho bashinjwa kugerageza kuroga abakinnyi ba Kiyovu Sports. Ibi byabaye umwaka ushize ushize w’imikino ubwo Kiyovu Sports yagombaga gukina na APR FC umukino wo kwishyura w’igikombe cy’amahoro, umukino ubanza wari warangiye ari 1-1, hanyuma muri uyu mukino bivugwa ko abakozi 3 ba APR FC bagerageje kuroga abakinnyi ba Kiyovu Sports warangiye APR FC itsinze Kiyovu Sports ibitego 2-1 ndetse ihita iyikuramo mu gikombe cy’Amahoro.
Abakozi 3 ba APR FC ubuyobozi bwayo bwemeza ko bafunze ni MUPENZI Eto’o wari ushinzwe igura n’igurisha ry’abakinnyi, Major UWANYIRIMPUHWE Jean Paul wari ushinzwe ubuzima bwa buri munsi bw’ikipe (Team Manager) n’umuganga Major Dr NAHAYO Ernest.
Abajijwe impamvu bitari byaratangajwe hambere, Lt col KARASIRA yavuze ko ntakubitangaza kurenze uretse kuba barabataye muri yombi.
Pyramids ifitanye umukino na APR FC kuri iki cyumweru ikaba isangwa ku rutonde rw’amakipe akomeye ku mugabane w’Afurika rwakozwe hagendewe k’uko amakipe yitwaye kuva ku ya 1 Nzeri 2022 kugeza ku wa 31 Kamena 2023. Kuri uru rutonde ikaba ari iya 4 aho ikurikira Al Ahly ya mbere, Wydad Athletic Club ya kabiri, Yanga SC ya gatatu hanyuma Pyramids ikaza ari iya 4. Kuri uru rutonde hagaragaraho andi makipe nka Mamelodi Sundowns, Far Rabat, Raja Casablanca, Zamalek, CR Belouizdad na USM Alger nizo 10 za mbere.
