Bisabye amezi agera muri abiri umukinnyi wo mu kibuga hagati Sofyan Amrabat ngo yerekeze mu ikipe ya Manchester United avuye mu ikipe ya Fiorentina yo mu Butaliyani.
Mu ijoro rya nyuma ry’isoko ry’igura n’igurisha ry’abakinnyi, kuri uyu wa gatanu nibwo ikipe ya Manchester United yamaze gusinyisha umusore Sofyan Amrabat nk’intizanyo avuye muri Fiorentina. Amrabat akaba yatanzweho agera kuri miliyoni ÂŁ8.85 (€10) gusa hakaba hari amasezerano ko mu mwaka utaha w’imikino, ikipe ya Manchester United ishobora guhita igura bya burundu Amrabat kuri miliyoni ÂŁ17 (€20).
Amrabat w’imyaka 27 yanze menshi mu makipe yamushakaga, amaso ye ayahanga mu ikipe ya Manchester United gusa. Uyu musore yigaragaje by’umwihariko mu gikombe k’isi cya 2022 cyaberaga muri Qatar ubwo ikipe y’igihugu ya Maroc yandikaga amateka yo kuba ikipe ya mbere yo muri Afurika yageze muri 1/2 k’irangiza k’igikombe k’isi.
Akigera muri Manchester United, Sofyana Amrabat yagize ati:”Ni iby’agaciro kuza muri Manchester United, byansabye kwihangana ntegereje umunsi nk’uyu gusa burigihe numvira umutimanama wange ndetse ubungubu ngiye gukinira ikipe y’inzozi zange. Nzakora burikimwe ku bw’ikipe yange.”
Yakomeje agira ati:”Nzi neza imikorere y’umutoza Erik Ten Hag n’icyo aba ashaka ku bakinnyi be. Nizeye ko azamfasha mu kwerekana uwo ndiwe, nkagira uruhare rw’umusaruro mwiza w’ikipe nk’uko uburyo bw’imitoreze ye bwamfashije no kuba umukinnyi na mbere.”
Umutoza Erik Ten Hag si ubwambere akorana na Sofyan Amrabat kuko banahuriye mu ikipe ya Utrecht yo mu Buholandi, iki gihe Ten Hag yari umutoza, yatoje iyi kipe kuva muri 2015-2017, Amrabat wari umukinnyi we yakiniye iyi kipe kuva 2014-2017.
Sofyan Amrabat aje yiyongera ku bakinnyi bo kibuga hagati Manchester United yarisanganywe barimo kapiteni wayo Bruno Fernandes, Donny Van de Beek ushobora kugenda, Casemiro, Scott McTominay, Kobbie Mainoo, Mason Mount na Hannibal.
