Ikipe ya Rayon Sports yagombaga gucakirana n’ikipe ya Al Hilal Benghazi yo muri Libya mu ijonjora rya kabiri rya CAF Confederations Cup, umukino ubanza wagombaga kubera muri Libya kuri uyu wa gatanu gusa uyu mukino ntabwo ukibaye.
Ku busabe bwa Al Hilal yasabye ikipe ya Rayon Sports ko imikino yombi (ubanza n’uwo kwishyura) yazakinirwa mu Rwanda, ibi ikipe ya Rayon Sports yabyakirije yombi cyane ko ari amahirwe kuri iyi kipe izwi ku mabara y’ubururu n’umweru kuba izakinira imikino yombi imbere y’abafana bayo i Kigali. Icyari gisigaye ni uko impuzamashyirahamwe y’umupira w’amaguru muri Afurika CAF ibiha umugisha.
Kera kabaye rero CAF yemeje ubwumvikane bw’aya makipe yombi, icyari gisigaye kwari ukumenya amatariki iyi mikino izakinirwaho cyane ko ayarateganyijwe bitari gukunda ko iyo mikino yazakinwa.
Amatariki yabaye ashyizweho by’agateganyo ni aya akurikira: umukino ubanza uzaba tariki ya 30 Nzeri 2023 naho umukino wo kwishyura ube tariki 7 Ukwakira 2023. N’ubwo aya matariki ariyo yabaye ashyizweho ashobora no guhindurwa gusa igihari cyo ni uko imikino yombi izabera mu Rwanda.
Bitewe nuko ibi byose byabaye ikipe ya Rayon Sports yamaze kwerekeza muri Libya ndetse ubu ikaba ariho iri kubarizwa yasanze ntamwanya wo gupfusha ubusa. Ahagana saa 20:00 za hano i Kigali ikipe ya Rayon Sports ikaba yakoreye imyitozo i Benghazi kuri Benina Martyrs International stadium iyi yakira abantu 10,000.
