Kuri iki cyumweru hakinwaga umunsi wa kane wa shampiyona y’Ubwongereza Premier League. Mu mukino uba utegerejwe n’imbaga nyamwinshi ikipe y’Arsenal yagaritse Manchester United maze iyitsinda ibitego 3-1.
Wari umukino wa 240 izi kipe zombi zakinaga mu mateka. Ikipe y’Arsenal bakunze kwita abarashi yari yakiriye ikipe ya Manchester United bita amashitani atukura kuri stade yayo ya Emirates iherereye mu majyaruguru y’Ubwongereza.
Mikel Arteta utoza Arsenal yari yabanje mu izamu Aaron Ramsdale, Ben White yugarira ku ruhande rw’iburyo, Oleksandr Zinchenko yugarira ku ruhande rw’ibumoso, Gabriel Maglhaes na William Saliba bari mu mutima w’ubwugarizi, Kai Havertz, Kapiteni Martin Odegaard na Declan Rice bari mu kibuga hagati, Gabriel Matinelli asatira izamu aciye ibumoso, Bukayo Saka yataka izamu aciye iburyo naho Eddie Nketiah ataha izamu. Abakinnyi barimo Thomas Partey, Mohamed Elneny, Nicolas Pepe na Jurrien Timber ntibagaragaye kuri uyu mukino kubera ibibazo by’imvune.
Ku ruhande rwa Manchester United umutoza Erik Ten Hag yabanje mu kibuga umuzamu Andre Onana, Aaron Wan-Bissaka yugarira ku ruhande rw’iburyo, Diego Dalot yugarira ku ruhande rw’ibumoso, Lisandro Martineza na Victor Lindelof bari mu mutima w’ubwugarizi, Casemiro, Kapiteni Bruno Fernandes na Christian Eriksen bari mu kibuga hagati, Marcus Rashford yasatiraga izamu aciye ku ruhande rw’ibumoso naho Antony akaryataka aciye ku ruhande rw’iburyo mu gihe Anthony Martial yashakiraga Manchester United ibitego. Abakinnyi barimo Mason Mount, Raphael Varane, Tom Heaton, Tyrell Malacia, Kobbie Mainoo, Luke Shaw na Amad Diallo ntibagaragawe kuri uyu mukino kubera ibibazo by’imvune. Rutahizamu uca ku mpande Jadon Sancho we ntiyagaragaye kuri uyu mukino kuko umutoza Erik Ten Hag yafashe umwanzuro wo kumukura mu bandi bakinnyi ngo kuko atitwaye neza mu myitozo.
Manchester United yatanze Arsenal kwinjira mu mukino maze umwongereza Marcus Rashford aterekamo igitego k’ishoti ku munota wa 27 ku mupira yarahawe neza na Christian Eriksen.
Arsenal ntiyatinze kwisubiraho kuko ku munota wa 28 hashize umunota umwe gusa ku ishoti rikomeye rya kapiteni Martin Odegaard yatsinze igitego kiza cyane, ni umupira yarahawe na Gabriel Martinelli. Igice cya mbere cyarangiye ari 1-1 ku mpande zombi.
Mu gice cya kabiri amakipe yombi yaje ashaka uko yabona igitego cya kabiri, ku munota wa 59 Kai Havertz yakorewe ikosa na Wan-Bissaka maze umusifuzi w’umukino Anthony Taylor asifura penaliti y’Arsenal gusa nyuma yifashishije VAR iza kwangwa kuko basanze Kai Havertz mu byukuri batamukozeho ahubwo yigwishije.
Manchester United yakoze impinduka zirimo gukuramo Anthony Martial hakaza Rasmus Hojlund wakinaga umukino we wa mbere muri Manchester United,
Lisando Martinez wagize ikibazo k’imvune yasimbuwe na Harry Maguire nawe wakinaga umukino we wa mbere muri uyu mwaka w’imikino, Antony asimburwa na Alejandro Garnacho naho Victor Lindelof asimburwa na Johnny Evans w’imyaka 35 y’amavuko. Garnacho wari wagiyemo asimbuye yatsinze igitego ku munota wa 87, abafana b’iyi kipe bose bajya mu bicu gusa nyuma hasifurwa ko uyu musore ukomoka muri Argentine yari yaraririye.
Arsenal nayo yakoze impinduka ishaka igitego harimo nko gukuramo Nketiah hakaza Gabriel Jesus wari wagarutse, Zinchenko yavuyemo haza Takehiro Tomiyasu, Kai Havertz asimburwa na Fabio Vieira, Gabriel Martinelli asimburwa na Reis Nelson naho Kapiteni Odegaard asimburwa na Jorginho gusa bikomeza kunanirana.
Iminota 90 y’umukino yarangiye maze hongerwaho iminota 8 y’inyongera. Ku munota wa gatatu mu yinyongera nibwo Arsenal yabonye koruneri yazamuwe neza na Bukayo Saka maze umupira usanga Declan Rice ahagaze wenyine aba avunderejemo ishoti ryavuyemo igitego cya kabiri ku ruhande rw’Arsenal.
Manchester United yakomeje kugerageza kwishyura, mu gihe abakinnyi bayo bose bari bazamutse umupira bawutakaje usanga Fabio Vieira wari wagiyemo asimbuye ahagaze neza ahita awuha Gabriel Jesus warusigaye wenyine maze yirukankana umupira, acenga myugariro Evans wari wagiyemo asimbuye maze aterekamo igitego cya gatatu, umuzamu wa Manchester United Onana ntakindi yari gukora uretse gutanga umugabo. Umukino ni uko waje kurangira Arsenal yari mu rugo itsinze Manchester United ibitego 3-1.
Umutoza wa Manchester United Erik Ten Hag ntabwo yishimiye ibyavuye mu mukino ndetse byumwihariko yanenze imisifurire avuga ko itababaniye.
Mu mikino 240 Arsenal na Manchester United zimaze guhuramo mu mateka n’umukino wa none urimo, Arsenal yatsinze imikino 88, banganya imikino 53 naho Manchester United itsinda imikino 99.
Umukinnyi Gabriel Jesus ukinira Arsenal akomeje guca agahigo aho uyu musore muri buri mukino yatsinzemo igitego muri Premier League ikipe yakiniraga ntiyigeze itakaza umukino. Muri make ntagihe Gabriel Jesus arinjiza igitego muri Premier League ngo ikipe akinira itsindwe, imikino imaze kuba 57 kuri uyu musore ukomoka muri Brazil.
Nyuma y’umukino ikipe y’Arsenal yahise ifata umwanya wa 5 n’amanota 10, yinjije ibitego 8 yinjizwa ibitego 4 ubwo yizigamye ibitego 4 naho Manchester United yisanze ku mwanya wa 11 n’amanota 6 mu mikino 4, yinjije ibitego 5 yinjizwa 7 ubwo ifite umwenda w’ibitego 2.
Mu yindi mikino y’umunsi wa kane yakinwaga; ikipe ya Liverpool yatsinze Aston Villa ibitego 3-0, naho ikipe ya Crystal Palace itsinda bigoranye Wolverhampton Wanderers ibitego 3-2.
Umunsi wa gatanu wa Premier League uzakinwa hagati ya tariki ya 16-18 Nzeri 2023, kuri ubu amakipe akaba agiye mu karuhuka mpuzamahanga kuko hagiye kuba imikino y’amakipe y’ibihugu muri iki cyumweru tugiye.
