Ni igikombe k’isi cy’abari n’abategarugori mu mupira w’amaguru kiri kuba ku nshuro yacyo ya 9, kiri kubera mu bihugu 2 aribyo New Zealand na Australia. Iki gikombe kiba buri myaka 4 kikaba cyaritabiriwe n’amakipe 32 yari mu matsinda.
Nyuma y’amatsinda amakipe yabaye ayambere yagiye mu kiciro gikurikiyeho cyo gukuranwamo. Aha ni naho amakipe 3 muri 4 yarahagarariye umugabane w’Afurika yaviriyemo ariyo Afurika y’Epfo, Maroc na Nigeria. Zambia yo yaviriyemo mu matsinda.
Bari muri 1/2 k’irangiza aho hagombaga kumenya amakipe ajya ku mukino wa nyuma n’amakipe azahatanira umwanya wa 3.
Umukino wa 1/2 wa mbere wabaye kuri uyu wa kabiri aho ikipe y’igihugu ya Espagne yatanaga mu mitwe n’ikipe y’igihugu ya Suede. Uyu mukino wabereye kuri stade ya Eden Park yo muri New Zealand warangiye Espagne igeze ku mukino wa nyuma ku nshuro yayo ya mbere itsinze Suede ibitego 2-1.
Undi mukino wa 1/2 k’irangiza wabaye kuri uyu wa gatatu wahuje Australia n’Ubwongereza, wabereye kuri Australia stadium. Uyu mukino warangiye ikipe y’Ubwongereza igeze ku mukino wa nyuma itsinze Australia ibitego 3-1.
Kuri uyu wa gatandatu tariki ya 19 Kanama 2023 harakinwa umukino wo guhatanira umwanya wa gatatu uzahuza Suede na Australia naho umukino wa nyuma uzakinwa kuri iki cyumweru tariki 20 Kanama 2023 ukazahuza ikipe y’igihugu ya Espagne n’ikipe y’igihugu y’Ubwongereza ni umukino uzabera kuri Australia stadium yo muri Australia saa 12:00 z’amanywa za hano i Kigali mu Rwanda.
