Nyuma y’uko ubusabe bwa Al Hilal Benghazi bwo kwakirira ikipe ya Rayon Sports kuri Kigali Pele Stadium bwemewe, kuri ubu yamaze gusaba impuzamashyirahamwe y’umupira w’amaguru muri Afurika CAF ko umukino ubanza uzayihuza na Rayon Sports waba ntabafana bari muri stade.
Rayon Sports yagombaga gukina na Al Hila Benghazi mu ijonjora rya kabiri rya CAF Confederations Cup tariki ya 15 Nzeri 2023, uyu wari kuba ari umukino ubanza wagombaga kubera i Benghazi muri Libya. Nyamara ariko uyu mukino byarangiye usubitswe kuko muri Libya hari haherutse kuba ibiza ibi byatumye amakipe yaho asaba ko amatariki y’imikino yahindurwa. Ibi byose ariko byabaye ikipe ya Rayon Sports yamaze kugera muri Libya.
Inama zarabaye hagati y’amakipe yombi maze ikipe ya Al Hilal Benghazi isaba ko umukino wayo yazawakirira i Kigai, birumvikana ibi Rayon Sports ntiyari kubyanga, icyari gisigaye kwari uko byemezwa na CAF, ntakabuza CAF yarabyemeje, umukino wa mbere ushyirwa tariki ya 24 Nzeri 2023 naho umukino wo kwishyura ushyirwa tariki 30 Nzeri 2023.
Nyuma yo kwemezwa ko Al Hilal izakirira umukino wayo mu Rwanda ibyishimo byabaye byinshi ku bakunzi ba Rayon Sports kuko bari bagize amahirwe yo kuzashyigikira ikipe yabo mu mikino yombi ubanza n’uwo kwishyura. Ibi ariko Al Hilal nabyo yabitekerejeho kuko izi umurindi n’umubare munini w’abafana ba Rayon Sports, ibi nibyo byatumye ititaye ku mafaranga yazakuramo yandikira CAF iyisaba ko umukino yazakiramo ikipe ya Rayon Sports kuri Kigali Pele Stadium wazakinwa ntabafana bari muri stade.
Ubusabe bwa Al Hilal bubaye bwemewe byaba bivuze ko umukino ubanza uzayihuza na Rayon Sports uzakinwa ntamufana uri muri stade, ubwo abafana ba Rayon Sports bazashyigikira ikipe yabo mu mukino wo kwishyura.
Al Hilal Benghazi itegerejwe kugera i Kigali kuri uyu wa kane bibaye ntagihindutse ndetse abantu bagera kuri babiri bashinzwe gutegurira iyi kipe aho igomba kuzaba ubwo izaba iri mu Rwanda bamaze kugera i Kigali bakaba bacumbitse muri Marriott Hotel.
