Imvugo yari imaze kuba imwe, ni “Bakobwa mube mwibagirwa kwitabwaho n’abahungu kuko Premier League yagarutse” Ibi babivugiraga ko shampiyona z’ibihugu mu mupira w’amaguru by’umwihariko iyo mu Bwongereza zigiye kugaruka kandi umubare munini w’igitsina gabo ukaba ukunda ndetse unakurikirana iyi mikino. Igihe cyari gitegerejwe ni iki, umunsi ni uyu, kuri uyu munsi tariki ya 11 Kanama 2023 nibwo umwaka w’imikino wa 2023/24 uri butangire muri shampiyona y’igihugu y’Ubwongereza Premier League.
Premier League irabimburirwa n’umukino uri buhuze ikipe ya Burnley na Manchester City ifite igikombe giheruka kuri stade ya Burnley yitwa Turf Moor saa 21:00 za nijoro. Uretse kuba uyu ari umukino ufungura shampiyona, ni n’umukino ugize icyo uvuze ku batoza b’aya makipe yombi, ikipe ya Burnley itozwa na Vincent Kompany, uyu yahoze ari umukinnyi wa Manchester City ndetse yanabaye kapiteni wayo mu gihe cy’imyaka 8 muri 11 yahakinnye kuko yahakinnye kuva 2008-2019. Vincent Jean Mpoy Kompany ni Umubiligi ariko ufite inkomoko muri DR Congo, yakinaga nka myugariro ndetse ni umwe mu beza babayeho muri iyi shampiyona y’Ubwongereza, kuri ubu afite imyaka 37 y’amavuko aho yavutse tariki ya 10 Nzeri 1986. Ku rundi ruhande ariko ikipe ya Manchester City itozwa na Pep Guadiola w’imyaka 52, uyu yayigezemo avuye mu ikipe ya Bayern Munich yo mu Budage muri 2016 kugeza na n’ubu. Birumvikana neza ko Pep Guadiola ukomoka muri Espagne yatoje Vincent Kompany akiri umukinnyi mu gihe k’imyaka 3, muri make ni umwana na se cyangwa se umwarimu n’umunyeshuri baba bahanganye. Amahirwe yo gutsinda arahabwa Manchester City kuko ari nayo ifite igikombe giheruka mu gihe ikipe ya Burnley n’ubwo iri mu rugo yo aribwo izamutse mu kiciro cya mbere.
Shampiyona y’igihugu y’Ubwongereza izakomeza ku munsi w’ejo aho amakipe nka Arsenal izakina na Nottingham Forest saa 13:30, AFC Bournemouth ikine na West Ham United saa 16:00, Brighton & Hove Albion ikine na Luton Town saa 16:00, Everton ikine na Fulham saa 16:00, Sheffield United izamutse uyu mwaka ikine na Crystal Palace saa 16:00 naho Newcastle United ukine na Aston Villa saa 18:30 naho indi mikino ikazaba ku cyumweru Brentford ikina na Tottenham Hotspur saa 15:00 naho Chelsea ikine na Liverpool saa 17:30 ari nawo mukino utegerejwe na benshi. Ikipe ya Manchester United yo izakina ku wa 1 ihura na Wolverhampton Wanderers saa 21:00 z’ijoro.
Si Premier League iributangire gusa muri shampiyona 5 zikunzwe cyane ku mugabane w’iburayi ahubwo na shampiyona y’igihugu ya Espagne La Liga iratangira ndetse na shampiyona y’igihugu y’Ubufaransa Ligue 1 naho shampiyona y’igihugu y’Ubudage Bundesliga izatangira tariki 18 Kanama 2023 naho shampiyona y’igihugu y’Ubutaliyani itangire tariki ya 19 Kanama 2023.
