Kuri uyu wa gatanu saa 23:00 z’ijoro nibwo isoko ry’igura n’igurisha ry’abakinnyi ry’iyi mpeshyi riraza kuba rishyirwaho akadomo. Ni amasaha make asigaye ngo abakinnyi barekere guhindura amakipe n’amakipe arekere kongeramo abakinnyi.
Amakipe menshi ari kugira bwangu atanguranwa n’igihe ngo asinyishe abakinnyi. Nyamara hari abakinnyi basa nk’abaryamye ndetse nta makipe bari kuvugwamo, bivuze ko ntagihindutse iri soko ry’igura n’igurisha rishobora kubasiga ari abashomeri.
Muri iyi nkuru amakuru mashya yaguteguriye urutonde rw’abakinnyi 5 badafite amakipe kandi ari ibihangange, bibaye ntagihindutse bashobora no kuguma ari abashomeri muri uyu mwaka w’imikino ugiye kuza.
1. David de Gea
David De Gea ni umuzamu ukomoka muri Espagne w’imyaka 32. De Gea yabaye umuzamu wa mbere wa Manchester United kuva mu mwaka w’imikino wa 2011/12 kugeza muri uyu mwaka wa 2023 ubwo yatandukanaga n’iyi kipe agasimbuzwa umunya-Cameroon André Onana. Bimwe mu byo umutoza Erik Ten Hag yagendeyeho atandukana na De Gea ni uko atazi gukinisha amaguru nyamara imikinire igezweho isaba ko umupira utangizwa n’umuzamu.
Ubwo yari muri Manchester United, De Gea yashyizwe mu ikipe y’umwaka PFA team of the year inshuro 5, anaba umukinnyi mwiza w’umwaka wa Manchester United mu mwaka w’imikino wa 2021/22, yatwaranye na Manchester United ibikombe 8.
Kuri ubu David de Gea nta kipe afite ndetse ntayo ari kuvugwamo muri aya masaha ya nyuma y’isoko ry’igura n’igurisha ry’abakinnyi.
2. Sergio Ramos
Sergio Ramos ni myugariro ukomoka muri Espagne w’imyaka 37. Nyuma y’imyaka 2 Ramos yaramaze muri Paris Saint Germain akaza gutandukana nayo kuri ubu nta kipe afite. Uyu mugabo yabaye kapiteni wa Real Madrid ni numwe muri ba myugariro beza b’iki kinyejana gusa ku myaka ye 37 bigaragara ko nta kipe iri kumwifuza y’iburayi.
Iyo ukurikiranye imbugankoranyambaga za Sergio Ramos ubona ko aba akora imyitozo nk’uwiteguye ikipe nshya gusa ntayibishyiramo umurava.
Imwe mu makipe bivugwa ko yaba yifuza Ramos ni Inter Miami yo muri Leta Zunze Ubumwe z’Amerika, iyi iherutse kwibikaho kizigenza Lionel Messi, Jordi Alba na Sergio Busquetes. Binajyanye n’imyaka ye, dushobora kutongera kubona Ramos akina Ibirayi.
3. Eden Hazard
Umunyempano muri shampiyona y’Ubwongereza Eden Hazard mu myaka 7 yahamaze gusa aza kugurwa na Real Madrid yo muri Espagne benshi bamwitegaho byinshi kugeza igihe atabitangiye. Mu myaka 4 umubiligi Eden Hazard w’imyaka 32 yamaze muri Real Madrid kuva muri 2019 ntiyabashije kuyikinira imikino irenze 76, ngo ayitsindire ibitego birenze 7 kandi mu marushanwa yose, igihombo gikomeye ku mukinnyi waguzwe miliyoni €115 million.
Bimwe mu byagoye Eden Hazard muri Real Madrid ni imvune. Benshi mu bazi ubuhanga bwa Hazard bari bamutegereje mu ikipe nshya Iburayi gusa bisa nk’ibiri kuba inzozi. Amakuru amwe aturuka mu Bufaransa avuga ko Hazard nyuma yo gusezera mu ikipe y’igihugu y’Ububiligi yarabereye kapiteni, ashobora no gusezera ku gukina umupira w’amaguru nk’uwabigize umwuga.
4. Jesse Lingard
Jesse Lingard umwe mu mpano za Manchester United, uyu musore w’imyaka 30 ni imwe mu mpano zari zitezwe gukora ibirenze muri Manchester United gusa yakomeje kugirwa intizanyo kugeza mu mwaka ushize w’imikino ubwo iyi kipe yanzuraga kumurekura.
Jesse Lingard ukina asatira izamu nyuma yo gutandukana na Manchester United yasinye umwaka umwe washoboraga kongerwa mu ikipe ya Nottingham Forest yarizamutse mu kiciro cya mbere, nyamara umusaruro wa Jesse Lingard warabuze muri iyi kipe kuko yabuze n’umwanya wo kubanza mu kibuga, yayikiniye imikino 20 ayitsindira ibitego 2 mu marushanwa yose, ibi byatumye nyuma y’umwaka w’amasezerano impande zombi zari zagiranye utongerwa.
Ku burambe bwe muri shampiyona y’Ubwongereza Premier League n’impano ye, Jesse Lingard ni umwe mu bakinnyi isoko ry’igura n’igurisha ry’abakinnyi rishobora gufunga batabonye amakipe yo ku mugabane w’Iburayi.
5. Mariano Diaz
Mariano Diaz niwe mukinnyi wahawe kwambara nimero 7 mu mugongo yarisanzwe yambarwa na kizigenza Cristiano Ronaldo warumaze kwerekeza muri Juventus. Ni umusore ukina nka rutahizamu.
Uyu musore w’imyaka 30 ukomoka muri Dominican Republic yaguzwe na Real Madrid muri 2018 avuye mu ikipe ya Olympique Lyon yo mu Bufaransa nyuma yo kuyitsindira ibitego 18 mu mikino 34 ya shampiyona y’Ubufaransa Ligue 1, iki gihe yatanzweho agera kuri miliyoni £20 gusa muri uyu mwaka wa 2023 nyuma y’imyaka 5 nibwo yatandukanye na Real Madrid.
Mu myaka 5 Mariano Diaz yamaze muri Real Madrid, yayikiniye imikino 84 ayitsindira ibitego 12, atanga imipira yavuyemo ibitego 3 mu marushanwa yose.
Nyuma yo kudahirwa muri Real Madrid, Mariano Diaz ni umwe mu bakinnyi badafite amakipe ndetse bashobora kwisanga ari abashomeri mu gihe turi mu masaha ya nyuma y’isoko ry’igura n’igurisha.
Hari abakinnyi benshi batarabona amakipe gusa aba ni 5 muri bo bamenyekanye kurusha abandi ndetse bahoze ari ibitangaza. Ibi bihamya umugani wo mu kinyarwanda ugira uti, “Ntagahora gahanze”
