Mu isoko ry’igura n’igurisha ry’abakinnyi ry’iyi mpeshyi ikipe y’Arsenal yongeye kwiyubaka nyuma yo kuba aba kabiri mu mwaka ushize w’imikino ngo izarushuhe kwitwara neza. Umwe mu bakinnyi iyi kipe yaguze ni myugariro Jurrien Timber w’imyaka 22 waje avuye muri Ajax Amsterdam y’iwabo mu Buholandi kuri miliyoni £40.
Mu mikino Jurrien Timber yaramaze gukinira Arsenal yigaragarije umutoza Mikel Arteta ndetse n’abakurikira umupira w’amaguru bahamya ubuhanga bw’uyu musore.
Ku munsi wa mbere wa shampiyona y’igihugu y’Ubwongereza Premier League ikipe ya Arsenal yakiriye Nottingham Forest kuri stade yayo ya Emirates Stadium aho yabashije no kuyitsinda ibitego ibitego 2-1. Jurrien Timber wari wabanje mu kibuga yasohotse acumbagira nyuma y’uko yaravunitse ku munota wa 50.
Ikipe ya Arsenal yatangaje ko imvune yo mu ivi ya Jurrien Timber ishobora kuba ikomeye nk’uko ubuvuzi bw’iyi kipe bubibona. Birasaba ko anyuzwa mu yandi masuzuma ngo harebwe uburemere bw’imvune ye n’igihe nyacyo uyu musore ashobora kumara hanze y’ikibuga. Iyi ni inkuru y’inshamugongo ku bafana b’Arsenal bari bamaze kubona agaciro k’uyu musore.
Imvune ya Jurrien Timber yaba ije yiyongera ku mvune ya Mohammed Elneny bitazwi igihe azagarukira, Folarin Balogun, Oleksandr Zinchenko, Nicolas Pepe, Sambi Lokonga na Gabriel Jesus bose bafite ikibazo k’imvune.
