Impuzamashyirahamwe y’umupira w’amaguru ku isi, FIFA, yamaze gutangaza amakipe 32 azakina igikombe cy’isi cy’ama-clubs muri 2025.
Ubusanzwe igikombe cy’isi cya clubs cyakinwaga mu Ukuboza, kikitabirwa n’amakipe yatwaye ibikombe by’amakipe yabaye aya mbere iwayo (Champions League) ku migabane itandukanye.
Yabaga ari amakipe atandatu arimo iyatwaye AFC champions League yo muri Aziya, CAF Champions League yo muri Afurika, CONCACAF champions cup yo muri Amerika y’Amajyaruguru, iyo hagati n’ibirwa bya Caribbean, CONMEBOL Libertadores (Copa Libertadores) yo muri Amerika y’Amajyepfo, OFC champions League yo muri Oseyaniya na UEFA Champions League yo mu Burayi.
Ryari irushanwa rigufi ku buryo ikipe yatwaraga igikombe ikinnye imikino ibiri cyangwa itatu gusa, ibi byatumaga iri rushanwa ritanitabwaho cyane.
Iri rushanwa rikaba ryaratangiye gukinwa muri 2005.
Muri 2016 nibwo Perezida wa FIFA Gianni Infantino yazanye igitekerezo cyo kwagura iri rushanwa maze rigakinwa n’amakipe 32 avuye impande zose z’isi aho kuba amakipe atandatu gusa, rikajya rikinwa muri Kamena na Nyakanga.
Ibi bikaba byari gufasha iri rushanwa guhabwa agaciro no guterwa inkunga.
Muri 2017 inama ya FIFA yongeye guterana noneho hatangwa ibitekerezo ko mu kwagura iri rushanwa ryajya rikinwa n’amakipe 24 aho kuba 32 nk’uko Infantino yabishakaga, rigakinwa muri Kamena na Nyakanga, rigakinwa rimwe mu myaka ine uhereye muri 2021.
Iki gitekerezo cyaje kwemezwa mu nama ya FIFA yabereye i Miami muri Leta Zunze Ubumwe z’Amerika muri 2019 ndetse biteganywa ko FIFA Club world cup yagombaga kuba muri 2021 yari gukinirwa mu Bushinwa, igakinwa n’amakipe 24.
Iri rushanwa byaje kurangira ritabaye kuko ryakomwe mu nkokora n’icyorezo cya COVID-19 cyugarije isi muri icyo gihe.
Tariki 23 Kamena 2023 nibwo FIFA yongeye gufata umwanzuro kuri iri rushanwa maze yemeza ko rizajya ryitabirwa n’amakipe 32, amakipe ane agashyirwa mu itsinda rimwe, hanyuma amakipe abiri akaba ariyo azamuka muri buri tsinda akajya mu kiciro cyo gukuranwamo (knockout stage).
Byemejwe ko iri rushanwa rizaba rikinwa ku nshuro ya mbere muri ubu buryo rizaba muri Kamena na Nyakanga 2025, rikabera muri Leta Zunze Ubumwe z’Amerika, rikajya rikinwa inshuro imwe mu myaka ine.
Imijyi irushanwa rizaberamo ntiratangazwa gusa bivugwa ko rizabera mu gice k’Iburasirazuba bwa Leta Zunze Ubumwe z’Amerika mu rwego rwo kwegera itangazamakuru ry’i Burayi ariko kandi ni no mu rwego bwo kwirinda kugongana n’igikombe k’ibihugu byo muri Amerika y’Amajyaruguru, iyo hagati no mu birwa bya Caribbean , CONCACAF Gold Cup, naryo ritegerejwe muri ayo matariki gusa rikazabera mu Burengerazuba bwa Leta Zunze Ubumwe z’Amerika.
Hagendewe kuki ngo hanzurwe amakipe azitabira FIFA Club World Cup 2025? Ni ayahe makipe azitabira?
Kugira ngo amakipe azakina iri rushanwa atoranywe hagendewe ku makipe aherutse kwegukana Champions League ku migabane itandatu uhereye muri 2021, ubundi harebwa ku rutonde rw’amakipe rw’impuzamashyirahamwe ku migabane itandatu.
Ku mugabane wa Afurika hazitabira amakipe ane, amakipe atatu aherutse kwegukana CAF Champions League n’ikipe imwe iri ku mwanya mwiza ku rutonde rwa CAF.
Amakipe azahagararira Afurika ni Al Alhy (Misiri) na Wydad Casablanca (Maroc) ziherutse kwegukana CAF Champions League, na ES Tunis (Tunisie) na Mamelodi Sundowns (Afurika y’Epfo) ziri ku myanya myiza ku rutonde rwa CAF.
Mamelodi Sundowns yabonye umwanya kuko muri CAF Champions League enye ziheruka, Al Ahly ifitemo eshatu bityo amakipe atatu aheruka kwegukana CAF Champions League yahise aba abiri aho kuba atatu.
Ibi nibyo byahaye umwanya Mamelodi Sundowns iri ku mwanya wa 4 ku rutonde rwa CAF.
Umugabane wa Aziya nawo uzahagararirwa n’amakipe ane, atatu aherutse kwegukana AFC Champions League n’ikipe imwe iri ku mwanya mwiza ku rutonde rwa AFC.
Amakipe azahagararira Aziya ni Al Hilal (Saudi Arabia), Urawa Red Diamonds (Japan), na Al Ain (United Arab Emirates) ziherutse kwegukana AFC Champions League na Ulsan HD FC (Koreya y’Epfo) kuko iri ku mwanya mwiza ku rutonde rwa AFC.
Uburayi buzahagararirwa n’amakipe 12, amakipe ane aherutse kwegukana UEFA Champions League n’amakipe 8 ari ku myanya myiza ku rutonde rwa UEFA.
Chelsea (Ubwongereza), Real Madrid (Espagne) na Manchester City (Ubwongereza) zizahagararia Uburayi kuko ziherutse gutwara UEFA Champions League.
Bayern Munich (Ubudage), Paris Saint Germain (Ubufaransa), Inter Milan (Ubutaliyani), FC Porto (Portugal), Benfica (Portugal), Borussia Dortmund (Ubudage), Juventus (Ubutaliyani), na Atletico Madrid (Espagne) zizahagararira Uburayi kuko ziri ku myanya myiza ku rutonde rwa UEFA.
Kuri aya makipe kandi hiyongeraho FC Salzburg (Austria) iri ku mwanya wa 18 ku rutonde rwa UEFA.
FC Salzburg yabonye umwanya kuko Real Madrid yegukanye UEFA Champions League ebyiri muri enye ziheruka ndetse amakipe ayiri imbere ku rutonde rwa UEFA amwe ntiyabonye itike yo kuzakina iki gikombe kuko ntagihugu kigomba kurenza amakipe abiri mu irushanwa.
Urugero: FC Barcelona ntabwo iri mu makipe azakina FIFA Club World Cup kandi iri imbere ya Salzburg ku rutonde rwa UEFA, impamvu ni uko Real Madrid na Atletico Madrid zombi zo muri Espagne zayije imbere zigahita zibona itike.
Amerika y’Amajyaruguru, iyo hagati n’ibirwa bya Caribbean izahagararirwa n’amakipe ane, ni amakipe ane aheruka kwegukana CONCACAF Champions Cup.
Ayo makipe ni Monterrey (Mexico), Seattle Sounders (Leta Zunze Ubumwe z’Amerika), Club Leon (Mexico), na Pachuca (Mexico).
Oseyaniya izahagararirwa n’ikipe imwe ya mbere ku rutonde rwa OFC.
Oseyaniya izahagararirwa na Auckland City yo muri New Zealand ya mbere ku rutonde rwa OFC.
Amerika y’Amajyepfo izahagararirwa n’amakipe 6, ane aheruka kwegukana Copa Libertadores n’amakipe abiri ari ku myanya myiza ku rutonde rwa CONMEBOL.
Palmeiras (Brazil), Flamengo (Brazil), na Fluminense (Brazil) zizitabira nk’ikipe ziheruka kwegukana Copa Libertadores naho River Plate (Argentina) izitabira nk’ikipe iri ku mwanya mwiza ku rutonde rwa CONMEBOL.
Hasigaye amakipe abiri mu makipe azahagararira Amerika y’Amajyepfo, akaba ari ikipe izegukana Copa Libertadores uyu mwaka n’ikipe imwe izaba iri ku mwanya mwiza ku rutonde rwa CONMEBOL.
Undi mwanya umwe ni uw’ikipe imwe yo muri Leta Zunze Ubumwe z’Amerika nk’igihugu kizakira irushanwa.
