Hashize igihe kigera ku cyumweru imiyaga yo mu nyanja yibasira igice cy’Aziya y’amajyepfo kirimo Ubushinwa, Hong Kong, Taiwan n’Ubuyapani, ni imiyaga yiswe Typhhoon Haikui. Iyi miyaga ikaba yarateje ibiza birimo imyuzure n’isuri.
Ibinyamakuru byo mu Bushinwa bivuga ko iyi miyaga imaze guhitana abantu 7 naho abandi 3 baburiwe irengero. Gusa none igikomeje gutera inkeke ni ingona zabaga mu kiyaga cyo muri Maoming mu ntara ya Guangdong zikomeje guhunga kuko iki kiyaga cyuzuriranye biturutse kuri iyo miyaga.
Haravugwa ingona zigera kuri 75 zamaze guhunga harimo ingona 69 nkuru ndetse n’izindi 6 zikiri ntoya. Bitewe n’ibi biza ngo zimwe mu ngona zafashwe kugira ngo zicungirwe umutekano nyamara ngo izindi hari ikizere ko wenda zaba ziri mu mazi hasi akaba ari yo mpamvu zitari kugaragara gusa ubutabaza bukomeje gukorwa ngo nazo zigaragare.
Ibinyamakuru byo mu Bushinwa bikomeza bivuga ko hari ingona 8 zamaze kuboneka, ndetse nyinshi muri izi ngo ubuzima bwazo bwari bugeze habi. Mu ngona zabonetse harimo izo mu bwoko bwa Siamese izi zishobora gukura kugeza kuri metero 3 z’uburebure.
Umwe mu bari mu butabazi bw’izi ngona yavuze ko nyinshi mu ngona nkuru zabonetse zipima ibiro 75, zikareshya na metero 2.
Umwe mu bakozi b’akarere ka Maoming yabwiye ikinyamakuru Dazhong Daily ko kuri ubu bari mu bikorwa by’ubutabazi bw’ingona ngo gusa umubare w’ingona zahunze cyangwa se zatorotse ni munini.
Muri aka karere ka Maoming mu ntara ya Guangdong mu Bushinwa habarizwa ubworozi buhambaye bw’ingona cyane ko uruhu rwazo ari ingenzi ndetse n’inyama zazo zikaba ziribwa.
