Umubiligi wakinaga mu kibuga hagati Marouane Fellaini-Bakkioui wamenyekanye muri Manchester United yasezeye ku mupira w’amaguru nyuma y’imyaka 18 ari umukinnyi. Yarasigaye akinira Shandong Taishan yo mu Bushinwa.
Fellaini yaramaze kurangiza amasezerano ye muri Shandong Taishan akaba yahisemo no guhita anasezera ku gukina umupira w’amaguru nk’uwabigize umwuga ku myaka 36 y’amavuko.
Muri 2004 – 2006 Fellaini yazamukiye mu ikipe y’abato ya Standard de Liège y’iwabo mu Bubiligi nyuma aza no kujya mu ikipe nkuru yayo, aho yayikiniye kuva mu 2006 – 2008. Standard de Liège kuri ubu inakinamo umunyarwanda Hakim Sahabo, anaherutse guhabwa igihembo cy’umukinnyi w’ukwezi kwa Mutarama muri iyi kipe.
Fellaini yakiniye Standard de Liège imikino 84 ayitsindira ibitego 12, atanga imipira 6 yavuyemo ibitego.
Nyuma yo kwigaragaza, uyu mukinnyi yifujwe n’amakipe arimo Real Madrid, Aston Villa, Tottenham Hotspur na Bayern Munich gusa biza kurangira muri 2008 asinyiye ikipe ya Everton yo mu Bwongereza kuri miliyoni £15 (Pounds). Iki gihe niwe warubaye umukinnyi wa mbere w’umubiligi uguzwe amafaranga menshi ndetse Everton niwe mukinnyi yariguze amafaranga menshi.
Muri Everton Fellaini yahakinnye kuva muri 2008 – 2013 mbere yo kwerekeza muri Manchester United. Fellaini yakiniye Everton imikino 177 ayitsindira ibitego 33, atanga imipira 26 yavuyemo ibitego.
Kuri miliyoni £27.5, muri 2013 Fellaini yaguzwe n’ikipe ya Manchester United, iyi kipe yo yayikiniye imikino 177 ayitsindira ibitego 22, atanga imipira 12 yavuyemo ibitego. Fellaini yavuye muri Manchester United muri 2019 abona kwerekeza mu Bushinwa muri Shandong Taishan, iyi kipe yo yaramaze kuyikinira imikino 141 ayitsindira ibitego 50, atanga imipira 13 yavuyemo ibitego.
Mu butumwa bwo gusezera Marouane Fellaini yanyujije ku mbugankonyambaga ze yagize ati;”Ndi kwandika ubu butumwa ngo ntangaze ko nsezeye ku gukina umupira w’amaguru nk’uwabigize umwuga nyuma y’imyaka 18.”
Yakomeje agira ati;”Mbega urugendo rwari igitangaza! Nishimira cyane kuba narakinnye uyu mukino kandi ku rwego rwo hejuru.”
Fellaini yatwaye ibikombe birimo FA Cup na Europa League ubwo yarikumwe na Manchester United ndetse yafashije ikipe y’igihugu y’Ububiligi kurangiriza ku mwanya wa gatatu mu gikombe k’isi cya 2018.
