Muri Mutarama 2023 nibwo kizigenza Cristiano Ronaldo yavuye mu ikipe ya Manchester United maze yerekeza mu ikipe ya Al Nassr muri Saudi Arabia. Cristiano yarabimburiye abandi bakinnyi benshi bahise bava i Burayi maze berekeza muri iki gihugu. Mu mpamvu nyamukuru zatumye benshi mu bakinnyi berekezayo ni amafaranga y’umurengera ariyo, abandi bakaba barabonaga ko ntamakipe akibashaka akomeye binatewe n’imyaka y’abo.
Mu gihe ntanumwaka ushize bamwe bagezeyo, byatangiye kuvugwa ko hari bamwe mu bakinnyi kuri ubu batangiye gutekereza kuba bagaruka i Burayi. Biravugwa ko impamvu ziri kubitera harimo kutabasha guhangana n’ikirere(Climate) kuko gitandukanye n’ik’i Burayi, umuco wihariye ubarizwa muri Saudi Arabia ubundi kandi hakaba ubwitabire bukiri hasi ku mikino yo muri Saudi Pro League.
Bamwe mu bakinnyi bivugwa ko bifuza kuva muri iki gihugu maze bagasubira i Burayi barimo umufaransa Karim Benzema ukinira Al Ittihad, umwongereza Jordan Henderson ukinira Al Ettifaq na Roberto Firmino ukinira Al Ahli.
Karim Benzema w’imyaka 36 y’amavuko, yagiye muri Al Ittihad avuye mu ikipe ya Real Madrid. Bikaba bivugwa ko yifuzwa na Manchester United yo mu Bwogereza kuko ngo hari byinshi yaza kwigisha rutahizamu ukiri muto w’iyi kipe Rasmus Hojlund.
Jordan Henderson w’imyaka 33 y’amavuko yerekeje muri Al Ettifaq avuye muri Liverpool. Uyu mwongereza yanahuye n’uruva gusenya ubwo yahamagarwa mu ikipe y’igihugu y’Ubwongereza maze ubwo bari mu mukino, abafana b’abongereza bakamukomera bavuga ko atakabaye yaragiye muri Saudi Arabia.
Robert Firmino w’imyaka 32 y’amavuko we yerekeje mu ikipe ya Al Ahli avuye mu ikipe ya Liverpool. Uyu mukinnyi ukomoka muri Brazil we avuga ko mu gihe yava muri Saudi Arabia ateganya gusubira muri Liverpool, byaba bidakunda akaba yasubira iwabo muri Brazil.
N’ubwo aba bakinnyi bimeze gutya ariko, Cristiano Ronaldo wabatanze muri iki gihugu we aryohewe n’ubuzima n’ikipe ye ya Al Nassr.
