Ikipe ya Liverpool yari yatangiye umwaka w’imikino neza ndetse kugeza ubu niyo iyoboye urutonde rwa shampiyona y’igihugu y’Ubwongereza Premier League aho mu mikino 20 imaze gukina yatsinzemo imikino 13, itsindwa umukino umwe, inganya imikino 6, Liverpool yinjije ibitego 43, yinjizwa ibitego 18 bivuze ko yizigamye ibitego 25 n’amanota 45. Kuri ubu ariko iyi kipe iri mu matsa nyuma yaho abakinnyi 8 bose bari inkiingi za mwamba kuri ubu badahari.
Abakinnyi ba Liverpool badahari biraterwa n’impamvu 2 z’ingenzi; impamvu ya mbere ni uko bamwe mu bakinnyi b’iyi kipe bagiye gukina imikino y’ibihugu, muri aba harimo Mohammed Salah wagiye gukinira ikipe ye y’igihugu ya Misiri mu gikombe cy’Afurika gitegerejwe kuva tariki ya 13 Mutarama 2024 kikazabera muri Côte d’Ivoire.
Undi mukinnyi udahari kubera imikino y’ibihugu ni Wataru Endo ukinira ikipe y’igihugu y’Ubuyapani, uyu nawe yagiye gukina imikino y’igikombe cy’Aziya gitegerejwe kuva tariki 12 Mutarama 2024, uyu mukinnyi w’imyaka 30 y’amavuko akaba asanzwe akina mukibuga hagati.
Abandi bakinnyi badahari muri Liverpool impamvu yabo ni imvune, aba bakinnyi barimo myugariro Andy Robertson, Thiago Alcantara, Joel Matip, Konstantinos Tsimikas, na Dominik Szoboszlai. Kuri uru rutonde hakaba hamaze no kwiyongeraho umwongereza Trent-Alexander Arnold nk’uko byemezwa na Liverpool ko uyu musore yagize imvune yo mu ivi ndetse ashobora kumara ibyumweru bike hanze y’ikibuga.
Arnold yavunitse mu mukino Liverpool yatsinzemo Arsenal ibitego 2-0 muri FA Cup.
