Umukinnyi w’imyaka 28 y’amavuko Manuel Obafemi Akanji ukinira Manchester City yo mu Bwongereza yishushanyijeho ikirango k’ikipe y’igihugu ya Nigeria nyamara akinira ikipe y’igihugu y’Ubusuwisi (Switzerland).
Manuel Akanji yavutse tariki 19 Nyakanga 1995, avukira Neftenbach mu Busuwisi kuri mama we w’umusuwisi na se wo muri Nigeria. Akanji yize ibijyanye n’ubucuruzi (Tradesman) ndetse ubwo yari kuri Swiss TV muri 2018 yagaragaje ubuhanga budasanzwe mu gukora imibare mu mutwe (Mental calculations).
Akanja yatangiriye gukina mu ikipe y’abato ya FC Winterthur muri 2007 ndetse yaje kwerekeza mu ikipe nkuru yayo muri 2014. Yahise abengukwa n’ikipe ya FC Basel muri 2015 aho yayikiniye kugeza muri 2018 ubwo yerekezaga muri Borussia Dortmund yo mu Budage.
Muri 2022 umutoza wa Manchester City Pep Guadiola yahise azana uyu myugariro mu ikipe ye ndetse batwarana ibikombe bitatu mu mwaka umwe ibyo ikipe ya Manchester City iheruka gukora mu mwaka ushize w’imikino itwara shampiyona y’Ubwongereza Premier League, UEFA Champions League n’igikombe gikuze kurusha ibindi cya FA Cup.
Hamwe na Akanji, Manchester City yanongereye igikombe k’isi cy’amakipe ya club kuri ibi bikombe bitatu yarimaze gutwara.
Dore igitangaje:
Manuel Obafemi Akanji yavukiye mu Busuwisi ndetse nyine umubyara ni umusuwisi bivuze ko nawe ari umusuwisi, ku rundi ruhande ariko se ni uwo muri Nigeria bivuze ko ari n’umunya-Nigeria.
Akanji yashoboraga gukinira Nigeria nk’ikipe yo kwa se ariko byarashobokaga ko yakinira n’Ubusuwisi. Amahitamo ye yaje kuba gukinira ikipe y’igihugu y’Ubusuwisi.
N’ubwo akinira Ubusuwisi, Akanji ntiyigeze yirengagiza Nigeria afitemo inkomoko byatumye yishushanyaho (Tattoo) y’ikirangantego k’ikipe y’igihugu ya Nigeria izwi nka Super Eagles.