Ikipe igizwe na Ntagengwa Olivier usanzwe ukinira Police VC na Gatsinzi Venuste ukinira APR VC mu bagabo n’ikipe ya Munezero Valentine na Mukandayisenga Benitha bombi basanzwe bakinira APR WVC mu bari n’abategarugori nizo zegukanye umwanya wa mbere mu gace ka mbere (Round 1) ka shampiyona y’Igihugu ya volleyball yo ku mucanga (Beach Volleyball) yaberaga kuri King Fisher Resort ku kiyaga cya Muhazi yasojwe kuri iki cyumweru tariki 3 Ugushyingo 2024.
Mu bagabo, Ntagengwa Olivier na Gatsinzi Venuste begukanye umwanya wa mbere nyuma yo gutsinda Kanamugire Prince na Paul Akan basanzwe bakinira APR VC amaseti 2-0 naho ikipe ya Niyikiza Levis ukinira APR VC na Nzirimo Mandela ukinira Gisagara VC yegukana umwanya wa gatatu.
Mu bagore, Munezero Valentine na Mukandayisenga Benitha begukanye umwanya wa mbere batsinze Nirere Aliane na Yankurije Françoise basanzwe bakinira Police WVC amaseti 2-0 naho ikipe ya Ukupabi na Mpeti Lolo Irene bombi bakinira RRA WVC yegukana umwanya wa gatatu.
Aya makipe yombi yegukanye umwanya wa mbere akaba ariyo asanzwe ahagararira u Rwanda muri volleyball yo ku mucanga.
Agace ka mbere ka shampiyona ya volleyball yo ku mucanga itegurwa n’Ishyirahamwe ry’umukino wa volleyball mu Rwanda, FRVB, katangiye gukinwa ku wa gatanu tariki 1 Ugushyingo 2024, gakinirwa King Fisher Resort ku kiyaga cya Muhazi.
Aka gace ka mbere kitabiriwe n’amakipe 14 mu bagabo yaragizwe n’abakinnyi 28 n’amakipe 8 y’abagore yaragizwe n’abakinnyi 16.
Biteganyijwe ko iyi shampiyona ya volleyball yo ku mucanga izakinwa mu duce (Rounds) dutatu harimo aka gace ka mbere kakiniwe kuri King Fisher Resort – Muhazi, agace ka kabiri kazakinirwa i Karongi naho agace ka gatatu gakinirwe i Rubavu.
Iyi shampiyona iba ku ngengabihe ya FRVB ndetse ifasha abakinnyi mu kuzamura amanota yabo muri volleyball yo ku mucanga dore ko yemewe n’Impuzamashyirahamwe y’Umukino wa Volleyball ku Isi, FIVB.
