Harabura iminsi 19 ngo mu Rwanda muri BK Arena habere imikino nyafurika ya basketball mu bari n’abategarugori ni irushanwa rya FIBA women’s Afrobasket. Iri rushanwa rizaba riba ku nshuro yaryo ya 28 rikaba rizaba kuva tariki ya 28 Nyakanga 2023 kugeza tariki 6 Kanama 2023.
FIBA Women’s Afrobasket ni irushanwa rihuza amakipe y’ibihugu y’abari n’abategarugori mu mukino wa basketball yo ku mugabane wa Afurika. Rikaba ryaratangiye gukinwa mu 1966, riba buri myaka ibiri, rikitabirwa n’amakipe 12 yo muri Afurika. Kuri ubu amakipe 12 azitabira yamaze kumenyekana ndetse kuri uyu munsi tariki ya 7 Nyakanga 2023 hakaba habaye tombora y’amatsinda aho hari amatsinda 4, muri buritsinda hakabamo amakipe 3, mu itsinda ryambere harimo u Rwanda (ari narwo ruzakira), Angola na Côte d’Ivoire,
mu itsinda B harimo Cameroon, Guinea na Mozambique, mu itsinda C harimo Mali, Senegal na Uganda naho mu itsinda D harimo Nigeria, Egypt na DR Congo.
Irushanwa riheruka ryegukanywe na Nigeria, ariko kandi ikipe ya Senegal niyo imaze kuryegukana inshuro nyinshi kurusha andi makipe kuko yaryegukanye inshuro 12.
