Mu irushanwa nyafurika rya FIBA AfroCAN riri kubera muri Angola, u Rwanda ruri mu itsinda C rwatsinzwe imikino yombi n’ikipe y’igihugu ya Tunisia na Morocco bituma ruba urwanyuma mu itsinda, mu gihe Tunisia ariyo yabaye iyambere.
Kuri uyu munsi wa 12 Nyakanga, iyi kipe y’u Rwanda igomba gukina umukino wa kamarampaka n’ikipe yabaye iya 2 mu itsinda D ariyo Mozambique kugira ngo bamenye uwerekeza mu kiciro gikurikiyeyo cya 1/4. Muri iki gitondo u Rwanda rukaba rwakoze imyitozo rwitegura uyu mukino uri bube saa 15:30 za hano mu Rwanda.
Mu yindi mikino ya kamarampaka itegerejwe ni Morocco na Cameroon, Nigeria na Gabon naho Côte d’Ivoire ikine na Mali. Amakipe yabaye ayambere mu itsinda niyo yahise abona itike ya 1/4 kirangiza ariyo Kenya, DR Congo, Angola na Tunisia. Ikipe iratsinda hagati y’u Rwanda na Mozambique izahura na Angola.
