Mu mukino wabaye kuri uyu wa gatandatu muri BK Arena uhuza abakinnyi baba baritwaye neza mu mwaka w’imikino wa basketball uzwi nka All Star Game warangiye Ikipe yatowe na NSHOBOZWA itsinze ikipe yatowe na TURATSINZE amanota 99-89.
Abakinnyi bahize abandi mu kwitwara neza uyu mwaka w’imikino muri basketball ni TURATSINZE Olivier usanzwe ukinira Espoir BBC uyu wabaye umukinnyi mwiza wa shampiyona (MVP) na NSHOBOZWABYOSENUMUKIZA Jean Jacques Wilson usanzwe ukinira APR BBC we yabaye MVP w’imikino ya kamarampaka ya BetPawa Playoffs.
Ikipe ya TURATSINZE yarigizwe n’abakinnyi barimo NDIZEYE Diedonne (Gaston), NIYUNGEHO Jean de Dieu, WAMUKOTA Bush, IRUTINGABO Fiston, HAGUMINTWARI Steven, BUGINGO Hubert, MUHIZI Prince, PODO Caleb, KIMASA Dan, MUHOZA Fabrice ndetse na BELECK Bell. Umutoza w’iyi kipe yari MURRAY Dean usanzwe utoza APR BBC akaba yari yungirijwe na MWISENEZA Maxime.
Ikipe ya NSHOBOZWA yo yarigizwe n’abakinnyi barimo ADONIS Filer, MUHAYUMUKIZA Eric, FULLA Rolly, SHYAKA Olivier, KAJE Elie, MUNYESHURI Thierry, KAMNDOH Frank, KALISA Brian, NIYONKURU Pascal, DONDON Elisee na NSHIZIRUNGU Patrick. Umutoza w’iyi kipe yari MWINUKA Henry usanzwe utoza REG BBC yungirijwe na NKUSI Karim.
Umukino watangiye ahagana saa 17:10 z’umugoroba agace ka mbere karangiye ikipe ya TURATSINZE igatwaye nyuma yo gutsinda amanota 30-26, mu gace ka kabiri ariko ikipe ya NSHOBOZWA nayo yaje yakaniye maze igatwara itsinze amanota 33-29. Nyuma y’ikiruhuko ikipe ya NSHOBOZWA yaje mu gace ka gatatu n’ubundi ibasha kugatwara nyuma yo gutsinda amanota 23-18, mu gace ka kane nabwo ikipe ya TURATSINZE ntiyabashije kwihagararaho maze bayitsinda amanota 17-12, umukino urangira ari amanota 99-89 ikipe ya NSHOBOZWA ariyo yegukanye insinzi.
Umusore ukomoka muri Repubulika Iharanira Demokarasi ya Kongo FULA NGANGA Rolly usanzwe ukinira APR BBC wari mu ikipe ya NSHOBOZWA niwe wabaye MVP w’uyu mukino nyuma yo gutsinda amanota 36, akora rebounds 10, atangana imipira 6 yavuyemo amanota mu minota 28 n’amasegonda 39 yakinnye muri uyu mukino.
Si uyu mukino wabaga gusa kuko wanabanjirijwe n’andi marushanwa afitanye isano na basketball aho abarushanwaga barushanwaga mu gutsinda amanota 3 ibizwi nka 3-points shooting contest mu rurimi rw’icyongereza abandi bakarushanwa mu gutera dunk ibizwi nka Slum Dunk contest.
Muri 3-Points shooting contest, MICOMYIZA Rosine usanzwe ukinira REG WBBC niwe wegukanye igihembo k’ibihumbi 500 mu bari n’abategarugori
naho MUNYESHURI Thierry wari mu ikipe ya NSHOBOZWA gusa usanzwe ukinira Kigali Titans BBC yegukanye iki gihembo mu bagabo.
Muri Slum dunk Contest DONDON Elisee wari mu ikipe ya NSHOBOZWA niwe wahize abandi mu gutera dunk nziza maze ahembwa ibihumbi 500 by’amanyarwanda, uyu musore asanzwe akinira APR BBC.
Kuri uyu munsi kandi nibwo KAMI Kabange w’imyaka 39 wamenyekanye mu makipe nka REG BBC, Espoir BBC na APR BBC ndetse akaba yaratangiye gukinira ikipe y’igihugu y’u Rwanda mu mukino wa basketball muri 2008 yasezeye ku mugaragaro ku gukina umukino wa basketball nk’uwabigize umwuga, mu ijambo rye akaba yashimiye ishyirahamwe ry’uyu mukino wa basketball hano mu Rwanda FERWABA kubera ubufasha bwayo byumwihariko kandi MUGWIZA Desire perezida wa FERWABA.
Nyuma y’ibi byose hakurikiyeho igitaramo cy’abahanzi bo muri Afurika Y’Epfo Nasty C na Cassper Nyovest basusurukije abitabiriye uyu mukino, si abo gusa ariko kuko Kivumbi King nawe yarahabaye ndetse yatunguranye ku rubyiniro maze azana umuhanzi uri mu bagezweho mu Burundi umuraperi Kirikou Akili maze bafatanya kuririmba indirimbo bafitanye yitwa Yarampaye yanasusurukije benshi mu bari muri BK Arena.
