Basketball: Shampiyona y’u Rwanda igiye gukomeza hakinwa imikino yo kwishyura

By
Masakombe Guillaume
-
110

Kuri uyu wa gatatu tariki 19 Werurwe 2025 nibwo Shampiyona y’u Rwanda ya basketball mu bagabo irakomeza hakinwa imikino yo kwishyura muri Petit Stade i Remera.

Kuri uyu munsi hategerejwe imikino ibiri irahuza Espoir BBC na REG BBC saa kumi n’ebyiri z’umugoroba naho sa mbiri z’ijoro, APR BBC ikine na UGB.

Uko imikino ibanza yarangiye

Shampiyona ya basketball irimo amakipe 9 bivuze ko ikipe yarangije imikino ibanza yakinnye imikino 8, amakipe yamaze gukina iyi mikino yose arimo APR BBC, Orion BBC na Espoir BBC naho amakipe nka REG BBC, Patriots BBC, UGB, Kepler BBC, Tigers BBC, na AZOMCO amaze gukina imikino 7.

Urutonde rwa shampiyona ruyobowe na APR BBC n’amanota 16, ikaba itaratsindwa na rimwe kuva shampiyona yatangira, REG BBC n’amanota 13 ni iya kabiri, Patriots BBC ni iya gatatu n’amanota 12, UGB ni iya kane n’amanota 11 inganya Orion BBC ya gatanu, Kepler BBC ni iya gatandatu n’amanota 10 inganya na Tigers BBC ya karindwi, Espoir BBC ni iya munani n’amanota 9 naho AZOMCO yazamutse uyu mwaka ni iya nyuma n’amanota 7, ntamukino iratsinda muri shampiyona.

Uko urutonde rwa shampiyona ruhagaze nyuma y’imikino ibanza

Abakinnyi bitwaye neza kugeza aho shampiyona igeze

  • Umukinnyi umaze gutsinda amanota menshi: Garba Chingka Kennedy wa Orion BBC amaze gutsinda amanota 176.
  • Umukinnyi umaze gutanga imipira myinshi yavuyemo amanota (Assists): Antino Alvalezes Jackson wa APR BBC amaze gutanga imipira 51 yavuyemo amanota.
  • Umukinnyi umaze gukora rebounds nyinshi: Garba Chingka Kennedy wa Orion BBC amaze gukora rebounds 135.
  • Umukinnyi umaze kwaka umupira inshuro nyinshi (Steals): Mohamed Doumbya wa UGB amaze kwaka umupira inshuro 25 anganya na Niyungeho Jean de Dieu wa Espoir BBC.
  • Umukinnyi umaze gutsinda amanota 3 inshuro nyinshi: Mwanawabene Ampire Fortunat wa Espoir BBC amaze gutsinda amanota 3 inshuro 19 anganya na William Robeyns Geralde wa APR BBC ndetse na Cole Elliott Lamar wa Patriots BBC.
  • Umukinnyi umaze gutsinda amanota 2 inshuro nyinshi: Garba Chingka Kennedy wa Orion BBC amaze gutsinda amanota 2 inshuro 70.
  • Umukinnyi umaze guhoma (Blocks) inshuro nyinshi: Muhoza Fabrice wa Espoir BBC amaze guhoma inshuro 20.
  • Umukinnyi umaze guhozaho kurusha abandi muri shampiyona (Efficiency): Garba Chingka Kennedy wa Orion BBC ahozaho ku kigero cya 230.Garba Chingka Kennedy wa Orion BBC umaze gutsinda amanota menshi muri shampiyona y’uyu mwaka