Ni igikombe k’isi cy’amakipe y’ibihugu mu mukino wa basketall cyaberaga muri Aziya, cyaje kurangira ikipe y’igihugu y’Ubudage ikegukanye nyuma yo gutsinda ikipe y’igihugu ya Serbia amanota 83-77.
Hari ku nshuro ya 19 igikombe k’isi mu mukino wa basketball mu bagabo gitegurwa n’ishyirahamwe ry’umukino wa basketball ku isi FIBA gikininwa. Cyatangiye gukinwa tariki ya 25 Kanama 2023 kikaba cyasojwe kuri iki cyumweru tariki ya 10 Nzeri 2023. Iki gikombe cyakiniwe mu migi 6 yo mu bihugu byo muri Aziya birimo Japan, Indonesia na Philippines, kitabirwa n’amakipe 32 yari mu matsinda 8 buri tsinda ririmo amakipe 4.
Ikipe y’igihugu y’Ubudage yatwaye igikombe yageze ku mukino wa nyuma imaze gukuruma Latvia muri 1/4 k’irangiza, ikuramo Leta Zunze Ubumwe z’Amerika muri 1/2 hanyuma igera ku mukino wa nyuma itsinda Serbia amanota 83-77, mu mikino 8 Ubudage bwakinnye muri iki gikombe bukaba ntamukino numwe bwatsinzwe.
Ikipe y’igihugu ya Serbia inakinamo kizigenza Nikola Jokic ukinira Denver Nuggets yo muri shampiyona ya mbere mu mukino wa basketball ku isi yo muri Leta Zunze Ubumwe z’Amerika NBA yo yari yageze ku mukino wa nyuma yarakuyemo Lituania muri 1/4, ubundi ikuramo Canada muri 1/2 gusa ku mukino wa nyuma ntibyayihiriye kuko yatsinzwe n’Ubudage, ibi byaherukaga no kuyibaho muri 2014 mu gikombe k’isi cyabereye muri Espagne nabwo Leta Zunze Ubumwe z’Amerika zatsinze Serbia ku mukino wa nyuma.
N’ubwo Serbia yageze ku mukino wa nyuma gusa uru rugendo ntabwo rwayibereye rwiza kuko yakinnye idafite bamwe muri ba kizigenza bayo barimo Ognjen Dobric wasohotse mu kibuga mu gace ka mbere nyuma yo kuvunika na Borisa Simanic wabazwe agakurwamo impyiko kubera ikibazo yagize ubwo bakinaga na Sudani Y’Epfo mu majonjora.
Ku mukino wo guhatanira umwanya wa 3 ikipe y’igihugu ya Canada yaje gutsinda Leta Zunze Ubumwe z’Amerika amanota 127-118. Ikipe yo muri Afurika yaje hafi ku rutonde rusange ni ikipe y’igihugu ya Sudani Y’Epfo yabaye iya 17, Misiri yabaye iya 20, Angola yabaye iya 26, Côte d’Ivoire iba iya 27, Cape Verde iba iya 28 mu makipe 32.
Umudage ariko ufite inkomoko muri Gambia Dennis Schroder w’imyaka 29 y’amavuko ukinira Toronto Raptors niwe wabaye umukinnyi mwiza w’irushanwa (MVP) nyuma yo gutsinda amanota 28 ku mukino wa nyuma ndetse ku mpuzandengo akaba yaratsindaga amanota 17.9 kuri buri mukino.
Igikombe k’isi cya basketball cyatangiye gukinwa mu 1950, bwambere gikinwa cyabereye muri Argentine, kikaba gikinwa buri nyuma y’imyaka 4. Leta Zunze Ubumwe z’Amerika na Yugoslavia zihariye agahigo ko kugitwara inshuro nyinshi mu mateka aho ibi bihugu byombi byagitwaye inshuro 5, Uburusiya bwagitwaye inshuro 3, Brazil na Espagne inshuro 2, Argentine igitwara inshuro 1, kuri ubu hiyongereyeho n’Ubudage bwagitwaraga ku nshuro yabwo ya mbere.
Amakipe y’ibihugu ya Brazil na Leta Zunze Ubumwe z’Amerika nibyo bihugu bitarasiba narimwe iki gikombe k’isi kuva cyatangira gukinwa. Umushinwa Yao Ming niwe mukinnyi muremure kurusha abandi wakinnye iki gikombe yareshyaga na metero 2.26 naho umukinnyi mugufi wakinnye iki gikombe ni umunyamerika Muggsy Bogues ureshya na metero 1.59.
Abakunda kureba umupira w’amaguru baziko igikombe k’isi aricyo gikombe gikuru k’ibihugu gusa muri basketball si uko, ahubwo imikino ya Olympic niryo rushanwa rikomeye ry’ibihugu muri basketball ari nayo mpamvu benshi mu bakurikiranye iki gikombe batabonye Leta Zunze Ubumwe z’Amerika zirimo ibihangange bisanzwe bimenyerewe muri uyu mukino birimo LeBron James, Stephen Curry, Kevin Durant n’abandi. Ahubwo igikombe k’isi cyakubera ikiraro cyo kujya muri Olympic.
Olympic zikaba zitegerejwe umwaka utaha wa 2024 zikazabera mu Bufaransa, amakipe arimo Sudan Y’Epfo muri Afurika, Canada na Leta Zunze Ubumwe z’Amerika muri Amerika (umugabane), Ubuyapani muri Aziya, Ubadage na Serbia mu Burayi na Autsralia muri Oceania niyo makipe yahise abona itike y’imikino ya Olympic. Impamvu yabyo ni uko harebwa amakipe ya mbere ku migabane yayo, hanyuma andi makipe akazakina amajonjora ngo abone itike yo gukina imikino ya Olympic.
