Bimaze kumenyerwa n’abakunzi b’umukino wa basketball ko nyuma ya shampiyona y’uyu mukino mu bagabo habaho umukino wa All star Game aho utegurwa n’ishyirahamwe ry’umukino wa basketball mu Rwanda FERWABA.
FERWABA All Star Game ni umukino uhuza amakipe abiri aho hatorwa abakinnyi bahize abahize abandi muri shampiyona hanyuma nabo bagatora muri bagenzi babo amakipe babona ababoneye. Aya makipe yombi aba agizwe n’abakinnyi bitwaye neza muri Shampiyona ahita akina umukino gusa ntibiba ari irushanwa. Uyu muco usanzwe umenyerewe no muri shampiyona ya mbere ku isi mu mukino wa basketball ya NBA yo muri Leta Zunze Ubumwe z’Amerika.
Shampiyona y’uyu mwaka ikaba yaratwaye na APR BBC nyuma yo gutsinda REG BBC imikino 4-0, ikipe ya Espoir BBC yabaye iya 3 naho Patriots iba iya 4, aha ni mu kiciro cy’abagabo.
Hamaze gutorwa abakinnyi 24 bahize abandi mu kwitwara neza muri Shampiyona aho aribo bagomba gutoranywamo amakipe abiri. Muri aba bakinnyi ikipe ya REG BBC ifitemo 5, Espoir ifitemo 5, APR BBC ifitemo 4, Patriots BBC ifitemo 2, IPRC-Huye ifitemo 2 naho Tigers BBC, UGB, Orion BBC, Kigali Titans na Shoot 4 Stars buri yose ifitemo umukinnyi umwe.
Ikipe ya mbere ikaba yaragijwe TURATSINZE Olivier usanzwe ukinira Espoir BBC nka kapiteni, uyu akaba ariwe watsinze amanota menshi muri shampiyona ndetse aba umukinnyi mwiza wa shampiyona, ikipe ye yahawe umutoza MWINUKA Henry usanzwe utoza REG BBC naho ikipe ya kabiri yahawe umutoza Dean Murray usanzwe utoza APR BBC naho kapiteni wayo ari nawe ugomba gutora abakinnyi ni NSHOBOZWABYOSENUMUKIZA Jean Jacques Wilson usanzwe ukinira APR BBC, uyu we yabaye umukinnyi mwiza w’imikino ya nyuma BetPawa Playoffs.
Uyu mukino wa FIBA All Star utegerejwe tariki ya 23 Nzeri 2023 ukazabera muri BK Arena ndetse amatike yo kwinjira kuri uyu mukino akaba yaramaze gushyirwa ku isoko aho ari 5,000 RWF, 10,000 RWF, 15,000 RWF, 25,000 RWF na 45,000 RWF. Abazitabira uyu mukino kandi bazataramirwa n’abaraperi bo muri Afurika y’Epfo Nasty C ndetse na Cassper Nyovest.
