Ikipe ya AZOMCO yazamutse mu kiciro cya mbere cya basketball mu Rwanda nyuma yo kwegukana igikombe cy’ikiciro cya kabiri itsinze Keplerians imikino 3-0.
Kuri uyu wa gatandatu tariki 17 Kanama 2024 nibwo hakinwaga umukino wa gatatu wa kamarampaka hagati ya AZOMCO na Keplerians.
Uyu mukino wabereye muri Lycee de Kigali wagiye kuba AZOMCO isabwa kuwutsinda kugira ngo yegukane igikombe, mu gihe Keplerians iyo iwutsinda hari kwiyambazwa umukino wa kane.
Uyu mukino watangiye saa kumi n’ebyiri z’umugoroba warangiye AZOMCO itsinze Keplerians amanota 77-63, ibi byayihaye kwegukana igikombe cya Shampiyona y’ikiciro cya kabiri itsinze imikino 3-0.
AZOMCO ikaba yahembwe igikombe giherekejwe na miliyoni eshatu z’amafaranga y’u Rwanda.
Umukino wa mbere wabaye tariki 10 Kanama 2024 warangiye AZOMCO itsinze Keplerians amanota 71-54, umukino wa kabiri wabaye tariki 14 Kanama 2024 warangiye AZOMCO itsinze Keplerians amanota 75-65.
AZOMCO ikaba izakina ikiciro cya mbere mu mwaka utaha w’imikino wa basketball mu Rwanda.
AZOMCO Global ni ikipe ikorera mu karere ka Bugesera yashinzwe muri 2022 ifite intego yo kuzamura abakinnyi bakiri bato, hakiyongeraho guhatanira kuzamuka mu kiciro cya mbere, ibi ikaba yabashije no kubigeraho.
Iyi kipe yashinzwe n’umunyamerika Yusef Aziz akaba ari umuyobozi wayo, akaba n’umutoza wayo.
Uyu mwaka ukaba wari uwa kabiri AZOMCO ihangana mu kiciro cya kabiri.
