Ikipe ya APR BBC yegukanye igikombe cya Shampiyona ya basketball 2024 nyuma yo gutsinda Patriots BBC mu mikino ya kamarampaka, BetPawa Playoffs 2024, imikino 4-2.
Kuri iki Cyumweru tariki 22 Nzeri 2024 muri BK Arena habereye umukino wa gatandatu wa nyuma wa kamarampaka muri basketball, BetPawa Playoffs 2024, hagati ya APR BBC na Patriots BBC.
Uyu mukino wagiye gukinwa APR BBC iyoboye n’imikino 3 kuri ibiri ya Patriots BBC, bivuze ko APR BBC yasabwaga gutsinda uyu mukino ngo yegukane igikombe mu gihe Patriots BBC yasabwaga gutsinda uyu mukino ngo hiyambazwe umukino wa karindwi.
Saa kumi n’ebyiri n’igice nibwo umukino watangiye hagati ya APR BBC na Patriots BBC.
Mu gace ka mbere Patriots BBC yarangije iri imbere n’amanota 19-17 gusa ntiyabasha kuyobora mu gace ka kabiri kuko yatsinzwe amanota 19-14.
Agace ka gatatu k’umukino niko katanze itandukaniro mu mukino kuko APR BBC yagatsinze ku manota 25-18.
Mu gace ka kane, Patriots BBC yagerageje gukuramo amanota 10 yari yarangije agace ka gatatu irushanwa na APR BBC gusa ntibyayikundira n’ubwo yagatsinze ku manota 19-12.
Umukino muri rusange warangiye APR BBC itsinze Patriots BBC amanota 73-70 ndetse ihita yuzuza imikino 4-2 bituma ihita yegukana igikombe cya BetPawa Playoffs 2024 ku nshuro ya kabiri yikurikiranya.
Isaiah Jaleel Miller niwe watsindiye APR BBC amanota menshi muri uyu mukino, yatsinze amanota 19 ndetse yahembwe miliyoni ebyiri z’amafaranga y’u Rwanda (2,000,000 RWF) nk’umukinnyi wahize abandi, MVP (Most Valuable Player) mu mikino ya BetPawa Playoffs.
Iki kikaba ari igikombe cya 15 cya Shampiyona ya basketball ikipe ya APR BBC yegukanye mu mateka yayo.
Nyuma y’umukino abakinnyi ba APR BBC bananiwe kwifata baterura umutoza wabo James E Maye waje kubafasha muri iyi mikino ya BetPawa Playoffs asimbuye Maz Trakh ndetse ntibibagiwe Isaiah Jaleel Miller wabafashije bikomeye muri iyi mikino.
Nyuma yo kwegukana igikombe cya BetPawa Playoffs, ikipe ya APR BBC niyo igomba guhagararira u Rwanda mu mikino ya BAL, Basketball Africa League, ku nshuro ya kabiri yikurikiranya.
Ubwo APR BBC iheruka guhagararira u Rwanda muri BAL yaviriyemo mu mikino y’amajonjora ikinirwa i Dakar muri Senegal, ntiyabashije kugera mu mikino ya nyuma yabereye i Kigali mu Rwanda muri BK Arena.
