Nyuma yo gutwara shampiyona ya basketball mu Rwanda ikayihesha gukina imikino ya BAL 2024, ikipe ya APR BBC igiye kwerekeza muri Qatar kwitegura iyi mikino itegerejwe kuva muri Werurwe – Kamena.
APR BBC y’umutoza Maz Trakh biteganyijwe ko izamara iminsi 10 muri Qatar ikazakina imikino 5 ya gishuti mu rwego rwo kwitegura neza.
APR BBC ni imwe mu makipe yubakitse neza binatewe n’abakinnyi bakomeye ifite barimo Filer Jovan Adonis Filer, NSHOBOZWABYOSENUMUKIZA Jean Jacques Wilson, WAMUKOTA Bush, NTORE Habimana, Dario Hunt, Chris Ruta, William Robeyns, KAJE Elie, Michael Dixon, Zion Styles, MANZI Dan na Mpoyo Axel.
Muri Basketball Africa League (2024), ikipe ya APR BBC iri mu itsinda rya Sahara iri kumwe na US Monastir yo muri Tunisia, AS Douanes yo muri Senegal na Rivers yo muri Nigeria. Iri tsinda rizakinira i Dakar muri Senegal.
Andi matsinda ni itsinda rya Kalahari ririmo Cape Town Tigers yo muri Afurika y’Epfo, FUS Rabat yo muri Maroc, Petro de Luanda yo muri Angola na Dynamo yo mu Burundi. Imikino y’iri tsinda izabera muri Afurika y’Epfo.
Mu gihe irindi tsinda ari irya Nile, iri ryo rizakinira mu Misiri rikaba ririmo Al Ahly yo mu Misiri, Al Ahly Benghazi yo muri Libya, City Oilers yo mu Bugande na Bangui Sporting Club yo Centre Africa.
