Ikipe ya AZOMCO BBC yatangiye gukoza imitwe y’intoki ku gikombe cy’ikiciro cya kabiri muri Basketball mu bagabo nyuma yo gutsinda Keplerians imikino 2-0.
Kuri uyu wa gatatu tariki 14 Kanama 2024 nibwo hakinwaga umukino wa kabiri wa nyuma wa kamarampaka hagati ya AZOMCO BBC na Keplerians.
Uyu mukino watangiye saa kumi n’ebyiri z’umugoroba muri Lycee de Kigali warangiye AZOMCO BBC itsinze Keplerians amanota 75-65 ni mu gihe umukino wa mbere AZOMCO yari yatsinze amanota 71-54.
Haba hateganyijwe gukinwa, imikino itanu, bivuze ko AZOMCO nitsinda umukino wa gatatu izahita yegukana igikombe, bivuze ko Keplerians biyisaba gutsinda imikino ibiri ngo haziyambazwe umukino wa gatanu.
Aya makipe yombi akaba yaramaze kubona itike yo kuzamuka mu kiciro cya mbere cya basketball mu Rwanda mu mwaka n’ubwo Keplerians itazemererwa kuzamuka kuko ari ikipe y’abato ya Kepler BBC ikina ikiciro cya mbere.
Kuba Keplerians itazazamuka, biteganyijwe ko umwanya wayo uzahabwa ikipe izaba yamanutse mu kiciro cya kabiri, hanyuma hakazazamuka ikipe imwe, hakamanuka ikipe imwe n’ubwo mu busanzwe amakipe abiri amanuka naho andi abiri akazamuka.
