APR FC yo mu Rwanda yatomboye Azam FC yo muri Tanzania mu ijonjora rya mbere ry’igikombe gihuza amakipe yabaye aya mbere iwayo muri Afurika, CAF Champions League, ritegerejwe gutangira muri Kanama 2024.
Ikipe izakomeza hagati ya APR FC na Azam FC izahura n’ikipe izakomeza hagati ya JKU yo muri Zanzibar na Pyramids FC yo mu Misiri mu ijonjora rya kabiri rya CAF Champions League.
Iyi Pyramids FC niyo yasezereye APR FC mu ijonjora riheruka iyitsinze igiteranyo k’ibitego 6-1.
Tombora ya CAF Champions League ikaba yabaye kuri uyu kane tariki 11 Nyakanga 2024, ibera mu Misiri ku Kicaro gikuru k’Impuzamashyirahamwe y’Umupira w’Amaguru muri Afurika, CAF.
Muri iyi tombola, amakipe atanu ya mbere muri Afurika ntabwo akina ijonjora rya mbere bivuze ko amakipe 54 ariyo yatoranywe muri iri jonjora.
Imikino ibanza itegerejwe hagati ya tariki 16-18 Kanama 2024 naho imikino yo kwishyura itegerejwe hagati ya tariki 23-25 Kanama mu ijonjora rya mbere.
Mu ijonjora rya kabiri, imikino ibanza izakinwa hagati ya tariki 13-15 Nzeri 2024 naho imikino yo kwishyura ikinwe hagati ya tariki 20-22 Nzeri 2024.
