Ikipe ya APR FC ishobora guterwa mpaga ku mukino w’umunsi wa munani wa shampiyona y’u Rwanda ku bwo kurenza umubare wemewe w’abanyamahanga mu mukino yanganyijemo na Gorilla FC 0-0.
Kuri iki Cyumweru tariki 3 Ugushyingo 2024 nibwo ikipe ya APR FC yari yakiriwe na Gorilla FC kuri Kigali Pelé Stadium mu mukino w’umunsi wa munani wa shampiyona.
Igice cya mbere cyarangiye amakipe yombi anganyije 0-0.
Mu gice cya kabiri kigitangira umutoza Darko Novic yakoze impinduka akuramo Dushimimana Olivier na Seidu Dauda Yussif yinjizamo Taddeo Lwanga na Ruboneka Bosco ashaka ko yabona igitego.
Nyuma y’uko ibi bitatanze umusaruro, Darko Novic yongeye gukuramo Richmond Lamptey na Tuyisenge Arsène ashyiramo Nwobodo Chidiebere wo muri Nigeria na Mamadou Sy wo muri Mauritania ku munota wa 54 w’umukino.
Aba banyamahanga babiri binjiye mu kibuga basangamo abandi banyamahanga batanu aribo Pavelh Ndzila, Aliou Souane, Taddeo Lwanga, Lamine Bah na Victor Mbaoma.
Bivuze ko APR FC yarigize abakinnyi b’abanyamahanga barindwi mu kibuga mu gihe amategeko yemeza kutarenza abakinnyi batandatu b’abanyamahanga mu kibuga.
Cyakoze bakinanye iminota ikabakaba 10 ubundi ku munota wa 63 ushyira uwa 64 Lamine Bah ahita asimburwa na Kwitonda Alain Bacca.
APR FC yarimaze kurenga ku mategeko n’amabwiriza ya shampiyona ntiyabashije kubona amanota atatu kuri uyu mukino kuko warangiye amakipe yombi aguye miswi y’ubusa ku busa.
Kuki APR FC ishobora guterwa mpaga?
Tariki 1 Nzeri 2024 nibwo hasohotse itangazo ryasinyweho na Kalisa Adolphe, Umunyamabanga mukuru mu Ishyirahamwe ry’Umupira w’Amaguru mu Rwanda, FERWAFA, ryavugaga ko mpinduka mu mabwiriza agenga Rwanda Premier League 2024-2025 mu ngingo ya 8.2.
Iyi ngingo ivuga ko amakipe yo mu kiciro cya mbere yemerewe gushyira abakinnyi b’abanyamahanga batarenze icumi no gukinisha abakinnyi b’abanyamahanga batarenze batandatu mu kibuga.
Ibi rero APR FC yabirenzeho kuko yakinishije abakinnyi b’abanyamahanga barindwi mu kibuga.
