AMAKURU: AMAZINA IBYAMAMARE BITANDUKANYE BYISE INGAGI

Kuri uyu wa gatanu tariki ya 1 Nzeri 2023 habaga umuhango wo “Kwita Izina” ku nshuro yawo ya 9. Ni abana b’ingangi bagera kuri 23 bavutse mu mezi 12 bagombaga kwitwa amazina. Ni umuhango ubera mu ntara y’Amajyaruguru mu karere ka Musanze ahazwi nko mu Kinigi.

Mbere y’umunsi nyirizina kuri uyu wa kane tariki 31 Kanama 2023 habanje kuba igitaramo cyo gutegura uyu munsi, abitabiriye iki gitaramo basusurukijwe na korali International et Ensemble Instrumental de Kigali yo mu idini Gatolika isanzwe ikorera i Kigali.

Ku munsi nyirizina imbaga nyamwinshi yari yitabiriye uyu muhango harimo urubyiruko n’abakuze, abavuye i Rwanda n’imahanga ni ababarirwa mu bihumbi 30. Ni umuhango wanitabiriwe na Madamu Jeannette KAGAME wari umushyitsi mukuru.

Abari bitabiriye uyu muhango wo kwita izina bataramiwe n’abahanzi barimo Eric SENDERI, Ariel Wayz, Riderman, Bwiza, Danny Vumbi, Bull Dog n’itsinda ry’ikinamico rya Mashirika ryaserutse mu muco gakondo.

Ng’uru urutonde rw’ibyamamare bitandukanye bivuye impande zose n’amazina byise abana b’ingagi.

1. Kevin Hart

Umunyarwenya akaba n’umukinnyi wa sinema wo muri Leta Zunze Ubumwe z’Amerika niwe wise ingagi bwambere, n’ubwo atari yabashije kwitabira ibi birori gusa Kevin Hart umwana w’ingagi yamwise “GAKONDO“, uyu mwana yavutse tariki ya 28 Werurwe 2023 ni uwo mu muryango wa MUHOZA. Kevin Hart nyiyabashije kwitabira uyu muhango gusa mu minsi yashize yari yasuye u Rwanda, asura n’ingagi ndetse herekanywe ubutumwa yafashe icyo gihe avuga ko yishimiye gusura ingagi.

2. INEZA UMUHOZA Grace

UMUHOZA washinze umuryango w’urubyiruko uharanira kurengera ibidukikije wa Green Protector nawe yise izina. UMUHOZA yise umwana w’ingagi “BIGWI” uyu mwana yavutse tariki ya 14 Kanama 2022 avukira mu muryango wa NTAMBARA.

3. Larry Green

Larry Green ni umugabo ukomoka muri Afurika y’Epfo, akaba ari mu nama y’ubutegetsi y’ikigo nyafurika kita ku nyamaswa Africa Wildlife Foundation (AWF). Larry umwana w’ingagi yamwise “INGOBOKA” uyu mwana yavutse tariki ya 27 Gashyantare 2023 avukira mu muryango wa HIRWA.

4. Danai GURIRA

Umukinnyi wa filime w’umunyamerika gusa ukomoka muri Zimbabwe w’imyaka 45 nawe yise izina umwana w’ingagi. Yise izina umwana w’umuhungu wavutse tariki ya 8 Ukwakira 2022, uyu mwana yamwise “AGUKA” akaba avuka mu muryango wa MUTOBO.

5. Anders Holch Povlsen

Uyu ni umushoramari ukomoka muri Denmark, ni umuyobozi w’ikigo gicuruza imyambaro ku isi cya Bestseller, akomeye cyane mu by’imideli. Povlsen umwana w’ingagi akaba yamwise “UMUTAKO” akaba yaravutse tariki ya 12 Gicurasi 2023, avuka mu muryango wa IGISHA.

6. Audrey Azoulay

Azoulay ni umuyobozi w’ishami ry’umuryango w’abibumbye ryita ku burezi, ubumenyi n’umuco UNESCO. Umwana w’ingagi yamwise “IKIRANGO” akaba yaravutse tariki ya 21 Nzeri 2022 avukira mu muryango wa SABYINYO.

7. Bernard Rama

Uyu mugabo w’imyaka 60 y’amavuko akaba ari umufaransa wakanyujijeho muri ruhago mu myaka yatambutse aho yakinaga nk’umuzamu, yakiniye amakipe arimo PSG, West Ham United, Rennes, Lille , Lens n’ayandi. Umwana w’ingagi akaba yamwise “RAMBA” akaba yaravutse tariki ya 19 Gashyantare 2023, avuka mu muryango wa MUHOZA.

8. BUKOLA Elemide (Asa)

Asa ni icyamamare muri muzika, akaba akomoka muri Nigeria, afite imyaka 40 y’amavuko. Asa akaba yise umwana w’ingagi izina rya “INGANZO” uyu mwana akaba yaravutse tariki ya 22 Nzeri 2022 avukira mu muryango wa DUSHISHOZE.

9. H.E Hazza AlQahtani 

AlQahtani ambasaderi wa Leta Zunze Ubumwe z’Abarabu UAE mu Rwanda akaba yise umwana w’ingagi izina rya “URUNANA”, uyu mwana akaba yaravutse tariki ya 4 Nzeri 2022, avuka mu muryango wa KWITONDA.

10. Zurab Pololikashvili

Zurab ni umunya-Georgia, akaba ari umunyamabanga mukuru w’umuryango wita ku bukerarugendo UNWTO, akaba ari kuri uyu mwanya kuva mu mwaka wa 2018. Zubra kaba yise izina umwana wo mu muryango wa ISIMBI wavutse tariki ya 1 Werurwe 2023, uyu mwana akaba yamwise “INSHINGANO”

11. KALIMPINYA Queen

KALIMPINYA wabaye igisonga cya gatatu cya nyampinga w’u Rwanda 2017, kuri ubu akaba ari umukinnyi wo gusiganwa mu mudoka ni umwe mu bise izina abana b’ingagi bavutse. Umwana w’ingagi, Miss KALIMPINYA yamwise “IMPUNDU” akaba yaravukiye mu muryango wa AGASHYA, avuka tariki ya 27 Kamena 2023.

12. Jonathan Ledgard

Ledgard ni umwongereza w’umwanditsi akaba n’inzobere mu bijyanye n’ikoranabuhanga, ibidukikije n’ubukungu bugezweho. Mu kwita izina, Ledgard yabatije ingagi izina rya “GISUBIZO”, uyu mwana yavutse tariki ya 12 Ukuboza 2022 avuka mu muryango wa KWITONDA.

13. Winston Duke

Icyamamare muri sinema wamenyekane nka M’Baku muri filime yabiciye bigacika muri 2019 ya Black Panther, nawe yise izina. Duke ukomoka muri Trinidad and Tobago, umwana w’ingagi yamwise “INTARUMIKWA”, uyu mwana akaba yaravutse tariki ya 1 Nyakanga 2023 avuka mu muryango wa MUTOBO.

14. Sol Campbell

Campbell w’imyaka 48 ni umwongereza uzwi cyane muri ruhago aho yamenyekanye mu ikipe y’Arsenal inafitanye imikoranire ya hafi n’u Rwanda muri gahunda ya Visit Rwanda. Uyu mugabo wakinaga nka myugariro n’ubwo yamenyekanye muri Arsenal gusa yakiniye andi makipe arimo Newcastle United, Tottenham Hotspur, Portsmouth n’ayandi, si ibyo gusa kandi kuko yabaye n’umutoza. Campbell yise umwana w’ingagi izina rya “JIJUKA”, JIJUKA yavutse mu muryango wa SEGASIRA avuka tariki ya 22 Gashyantare 2023.

15. INEZA Elvine

INEZA wiga mu mashuri abanza, mu ishuri rya Regina Pacis School ry’i Musanze  yise umwana w’ingagi izina rya “NIBAGWIRE”, uyu mwana w’ingagi yavutse tariki ya 29 Gicurasi 2023 avuka mu muryango wa SEGASIRA.

16. Idris Elba n’umufasha we Sabrina Dhowre Elba

Umukinnyi wa filime akaba n’umuhanzi Idris Elba wari wanitabiriye ibirori byo kwita izina n’umufasha we Sabrina bombi bise izina umwana w’ingagi. Uyu muryango wise izina ingagi rya “NARAME”, ni umwana wavukiye mu muryango wa MUTOBO akaba yaravutse tariki ya 29 Ukwakira 2022.

17. Rt. Hon. Andrew Mitchell

Hon Andrew Mitchell w’imyaka 67 ni umunyapolitike wo mu Bwongereza, akaba ari mu nteko ishingamategeko y’ubwami bw’Ubwongereza kuva muri 2001 ni umwe mu bise izina. Mitchell; umwana w’ingagi yamwise “MUKUNDWA”, ni umwana wo mu muryango wa PABLO wavutse tariki ya 9 Ukwakira 2022.

18. Nick Stone

Stone yise umwana w’ingagi “UMUCUNGUZI”, ni umwana wavutse mu muryango wa MUSIRIKARI, akaba yaravutse tariki ya 14 Gicurasi 2023. Uyu Nick Stone ni umuyobozi w’ikigo cy’ubukerarugendo cya “We are Wilderness”

19.  Joakim Noah na Lais Ribeiro

Joakim Noah w’imyaka 38 ni umukinnyi wakanyujijeho mu mukino wa basketball muri Leta Zunze Ubumwe z’Amerika. Uyu mugabo w’umufaransa yakiniye amakipe arimo Chicago Bulls, New York Knicks, Memphis Grizzlies na Los Angeles Clippers, akaba yazanye n’umufasha we ukomoka muri Brazil Lais Ribeiro. Uyu muryango umwana yamwise “TURUMWE” ni uwo mu muryango wa IGISHA akaba yaravutse tariki ya 7 Gicurasi 2023.

20. Cyrille Bollore

Cyrille Bollore ni umuyobozi w’ishoramari mu Bufaransa. Bollore yise umwana w’ingagi izina rya “MUGISHA“, ni umwana wo mu muryango wa DUSHISHOZE akaba yaravutse tariki ya 6 Ukuboza 2022.

21. Joe Schoendorf

Schoendorf ni umugabe umaze imyaka igera muri 50 mu ruganda rw’ikoranabuhanga. Uyu yise umwana w’ingagi izina rya “UBURINGANIRE” akaba yaravutse tariki ya 16 Mutarama 2023 avukira mu muryango wa MUSIRIKARI.

22. Prof. Ozlem Tureci, M.D & Dr. Sierk Poetting

Prof. Ozlem Tureci, M.D na Dr. Sierk Poetting bahagarariye ikigo cya BioNTech gikora ibijyanye n’inkingo mu muhango wo kwita izina. Umwana w’ingagi bamwise “INTIGANDA”, akaba ari umwana wavutse tariki ya 18 Mutarama 2023, avuka mu muryango wa AGASHYA.

23. DUSABEYEZU Innocent

Dusabeyezu ukora muri pariki y’Ibirunga kuva muri 2007 ndetse akaba afite umubano w’ihariye n’ingagi ni umwe mu bise izina ingagi. Dusabeyezu, umwana w’ingagi yamwise “MURARE” uyu mwana akaba ari uwo mu muryango wa KURYAMA, akaba yaravutse tariki ya 9 Kamena 2022.

Uru ni rwo rutonde rw’amazina 23 yahawe abana b’ingagi 23 bavutse mu mezi 12 ashize ndetse n’abagiye bita aya mazina.

Clare AKAMANZI uyobora ikigo gishinzwe iterambere RDB wari witabiriye uyu muhango, mu ijambo yagejeje ku bari muri iki gikorwa yavuze ko ari amahirwe akomeye kubona abana 23 b’ingagi biswe amazina cyane ko ugereranyije n’umwaka ushize izi nyamaswa ziba mu birunga zari zitangiye kugendera. Yasabye kandi abise amazina kuzajya bibuka gusura ingagi bise amazina, yakomeje avuga ko 70 % y’abana b’ingagi biswe amazina ari igitsina gore. Yashimiye kandi abakomeje kugira uruhare mu iterambere ry’ubukerarugendo bw’u Rwanda cyane ko imibare igaragaza ko bwazamutseho 56 % mu mezi atandatu ya mbere y’u mwaka.

Mu ijambo rya Guverineri w’intara y’Amajyaruguru MUGABOWAGAHUNDE Maurice yashimye cyane Leta y’u Rwanda muri gahunda zayo zo kuzamura ubukerarugendo, binajyana no kuzamura abaturiye pariki y’Ibirunga aho imishinga igera kuri 500 yamaze guterwa inkunga.

Mu ijambo ry’umushyitsi mukuru Madam Jeannette KAGAME, yagize ati,” Nimwitegereze abateraniye aha twese duhujwe no kwizihiza uyu munsi ukomeye mu kubungabunga ibidukikije. Ntawe bitanezeza kuba mubigiramo uruhare.” Yashimiye abitabiriye uyu muhango ku ruhare rwabo mu gutera ishema igihugu cy’u Rwanda.

Kuva uyu muhango wo Kwita izina watangira kubaho muri 2005, abana 374 nibo bamaze kwitwa amazina.