Ikipe ya kizigenza Cristiano Ronaldo yasezerewe muri 1/4 cy’irushanwa rihuza amakipe yambere iwayo ku mugabane wa Aziya, AFC Champions League.
Al Nassr yo muri Saudi Arabia yisanze igomba gucakirana na Al Ain yo muri Eminati Zunze Ubumwe z’Abarabu muri 1/4 k’irangiza.
Umukino ubanza warangiye Al Ain itsinze Al Nassr igitego 1-0 mu mukino wabereye muri United Arab Emirates.
Mu ijoro ryo kuri uyu wa mbere tariki 11 Werurwe 2024 ikipe ya Al Nassr yari yakiriye Al Ain mu mukino wo kwishyura wabereye kuri Al-Awwal Stadium muri Saudi Arabia.
Kugira ngo ikipe ya Al Nassr ikomeze yasabwaga gutsinda harimo itandukaniro ry’ibitego bibiri cyangwa ikaba yatsinda harimo itandukaniro ry’igitego kimwe ubundi hakiyambazwa penaliti.
Al Ain niyo yabanje gufungura amazamu ku munota wa 28 ku gitego cya Soufiane Rahimi ndetse yongera no gutsinda igitego cya kabiri ku munota wa 45. Abdulrahman Adbullah Ghareeb wa Al Nassr yaje kwishyurira iyi kipe igitego cya mbere ku munota wa gatanu w’inyongera w’igice cya mbere maze igice cya mbere kirangira ari ibitego 2-1.
Umuzamu wa Al Ain Khalid Eisa yitsinze igitego ku munota wa 51 maze biba ibitego 2-2 ariko Alex Telles wa Al Nassr aza kubona igitego ku munota wa 72 byatumye Al Nassr iyobora n’ibitego 3-2 ndetse bituma hiyambazwa iminota 30 y’inyongera.
Ku munota w’103 ikipe ya Al Ain yaje kubona igitego cyo kwishyura gitsinzwe na Sultan Alshamsi wari winjiye mu kibuga asimbuye ni mu gihe Cristiano Ronaldo yaje gufasha Al Nassr gutsinda igitego cya kane kuri penaliti ku munota w’118 bituma Al Nassr irangiza umukino itsinze ibitego 4-3.
Igiteranyo k’ibitego cyahise kiba ibitego 4-4 bituma hiyambazwa penaliti zarangiye Al Nassr isezerewe nyuma yo guhusha penaliti 3 muri 4 yateye bituma itsindwa penaliti 3-1.
Al Nassr yahushije penaliti ya mbere yatewe na Marcelo Brozovic, iya kabiri yatewe na Alex Telles n’iya kane yatewe na Otavio. Cristiano Ronaldo niwe wabashije kwinjira penaliti imwe rukumbi ya Al Nassr ni mu gihe Al Ain itigeze ihusha penaliti n’imwe muri 3 yateye.
Uretse uyu mukino wa Al Nassr na Al Ain muri AFC Champions League imikino ya 1/4 k’irangiza irakomeza kuri uyu munsi, Ulsan Hyundai irakira Jeonbuk FC zose zo muri Koreya y’Epfo.Umukino ubanza wari warangiye amakipe yombi anganyije 1-1.
Al Ittihad irakira Al Hilal zose zo muri Saudi Arabia, umukino ubanza warangiye Al Hilal itsinze ibitego 2-0.
Imikino izakomeza ku munsi w’ejo ikipe ya Yokohama F. Marinos yo mu Buyapani yakira Shandong Taishan yo mu Bushinwa. Umukino ubanza wari warangiye Yokohama itsinze ibitego 2-1.