Ntibisanzwe ko amakipe ya mbere ahaganye muri Espagne akaba namwe mu makipe akomeye ku isi Real Madrid na FC Barcelona ko abakinnyi bazikinira zombi kuko ukiniye ikipe imwe aba afatwa nk’umwanzi mu yindi. Muri iyi nkuru tugiye kugaruka ku bakinnyi bamwe bake babashije kubikora.
Ricardo Zamora
Uyu mukinnyi wo muri Espagne wakinaga nk’umuzamu niwe mukinnyi wa mbere mu mateka wabashije gukinira Real Madrid na FC Barcelona zose mu gihe yakinaga. Uyu muzamu wanitiriwe igihembo cy’umuzamu mwiza muri shampiyona ya Espagne La Liga Santander yakiniye FC Barcelona muri 1919 – 1921 nyuma ariko yaje kwerekeza muri Real Madrid aho yayikiniye mu 1930 – 1936.
Bernd Schuster
Uyu mukinnyi w’umudage wakinaga mu kibuga hagati nawe yakiniye FC Barcelona mu 1980 – 1988 nyuma aza no gukinira Real Madrid mu 1988 – 1990. Schuster yararenze akinira n’ikipe ya Atletico Madrid mu 1990 – 1993 nayo iri mu makipe akomeye muri Espagne.
Gheorghe Hagi
Hagi ni umukinnyi ukomoka muri Romania wakinaga mu kibuga hagati. Uyu mukinnyi yakiniye Real Madrid mu 1990 – 1992 nyumaza aza gukinira FC Barcelona mu 1994 – 1996. Hagi akaba yarakinaga mu kibuga hagati yugarira.
Julen Lopetegui
Lopetegui wananyuze mu ikipe ya Real Madrid nk’umutoza nawe ni umwe mu babashije gukinira aya makipe yombi. Lopetegui w’imyaka 57 y’amavuko kuri ubu utoza Wolverhampton Wanderers yo mu Bwongereza yakiniye Real Madrid mu 1989 – 1991 nyuma aza gukinira FC Barcelona mu 1994 – 1996. Lopetegui akaba yarakinaga nk’umuzamu.
Robert Prosinecki
Uyu munya-Yugoslavia yakiniye Real Madrid mu 1991 – 1994, nyuma Real Madrid yamutije mu ikipe ya Real Oviedo ubu iri mu kiciro cya kabiri muri Espagne. Nyuma yo kuva mu ntizanyo uyu mukinnyi wakinaga mu kibuga hagati yahize agurwa n’ikipe ya FC Barcelona maze ayikinira kuva 1995 – 1997.
Michael Laudrup
Uyu mukinnyi w’ibihe byose muri Denmark yakiniye FC Barcelona mu 1989 -1994. Nyuma Laudrup yaje kugurwa n’ikipe ya Real Madrid mu 1994 maze ayikinira kugeza mu 1996. Uyu yakinaga mu kibuga hagati asatira izamu.
Albert Celades
Umunya-Espagne Celades wanakuriye mu ikipe y’abato ya FC Barcelona yakiniye iyi kipe mu gihe k’imyaka ine (4) kuva mu 1995 – 1999, yaje guca muri Celta Vigo umwaka umwe ubundi yerekeza muri Real Madrid mu 2000 – 2005. Celades yakinaga mu kibuga hagati yugarira.
Luis Figo
Uyu ni umwe mu bakinnyi wavuzwe bigatinda ubwo yavaga mu ikipe ya FC Barcelona yerekeza muri Real Madrid mu 2000. Figo yageze muri FC Barcelona mu 1995 avuye muri Sporting Lisbon yo muri Portugal, iyi kipe yayikiniye kugeza mu 2000 ubwo yagurwaga na Real Madrid. Florentino Perez uyobora Real Madrid niwe wagize uruhare rukomeye mu kugura uyu mukinnyi wakinaga mu kibuga hagati.
Luis Enrique
Umunya-Espagne Enrique wanatoje ikipe ya FC Barcelona kuri ubu akaba atoza Paris Saint Germain yo mu Bufaransa nawe ni umwe mu bakinnyi bakiniye FC Barcelona na Real Madrid. Enrique yageze muri Real Madrid mu mwaka w’imikino w’1991/1992, aha yahamaze imyaka 5 mbere yo kwerekeza muri FC Barcelona mu mwaka w’imikino w’1996/1997 aho yakinnye kugeza muri 2003/2004. Luis Enrique yakinaga mu kibuga hagati ariko yashoboroga no gukina nka rutahizamu.
Alfonso Perez
Perez yakuriye muri Real Madrid ndetse aza kuyikinira kuva mu 1990 – 1995, nyuma ariko uyu mukinnyi yaje kwerekeza muri Real Betis, nyuma yo kwitwara neza ikipe ya FC Barcelona yaramubengutse maze iramusinyisha. Perez wakinaga nka rutahizamu yakiniye FC Barcelona mu 2000 – 2002.
Ronaldo Nazario
Ronaldo ni umwe mu bakinnyi b’ibyamamare bakiniye FC Barcelona na Real Madrid. Uyu munya-Brazil wakinaga nka rutahizamu yakiniye FC Barcelona mu 1996 – 1997. Yaje kwerekeza muri Inter de Milan yo mu Butaliyani nibwo yaje kugurwa na Real Madrid muri 2002 bigizwemo uruhare na Florentio Perez, Real Madrid yayikiniye kugeza mu 2007.
Samuel Eto’o
Umunya-Cameroon Eto’o wakinaga nka rutahizamu yasinyiye ikipe ya Real Madrid y’abato nyuma aza no kujya mu ikipe nkuru kuva mu 1997 – 2000. Eto’o yaje gutizwa muri Leganes, ubundi atizwa muri Espanyol ubundi yerekeza muri Real Mallorca. Nyuma yo kwitwara neza muri Espagne, FC Barcelona yaje gusinyisha Eto’o mu 2004, iyi kipe yayikiniye kugeza muri 2009 ndetse ni aha ni hamwe mu ho yagiriye ibihe byiza nk’umukinnyi.
Javier Saviola
Saviola niwe mukinnyi uheruka gukinira Real Madrid na FC Barcelona mu bihe bya vuba. Uyu mukinnyi wakinaga nka rutahizamu yakiniye FC Barcelona kuva mu 2001 – 2007. Saviola yanyuze muri AS Monaco, FC Sevilla ubundi asinyishwa na Real Madrid muri 2007. Mu myaka 2 yahamaze, Saviola yakiniye Real Madrid imikino 31. Uyu mukinnyi akaba akomoka muri Argentine.
