Kuva mu gitondo cyo kuri uyu wa gatatu tariki 29 Mutarama 2025, ku mupaka w’u Rwanda na Repubulika Iharanira Demokarasi ya Congo i Rubavu hari kwakirwa abacanshuro b’abanyaburayi binjira mu Rwanda.
Aba bacanshuro biganjemo abaturuka muri Romania barasaga 288, bakaba bararwanaga ku ruhande rw’ingabo za Repubulika Iharanira Demokarasi ya Congo, FARDC bazifasha kurwanya M23.
Ibi byose biri kuba nyuma y’uko umutwe wa M23 ufashe umujyi wa Goma.
Umuvugizi wungirije wa Leta y’u Rwanda, Alain Mukurarinda yabwiye itangazamakuru ko aba bacanshuro nyuma yo kugezwa mu Rwanda bahita burizwa imodoka bajyanwa ku kibuga cy’indege mpuzamahanga cya Kigali i Kanombe aho bafatira indege zibasubiza mu bihugu byabo.
Mbere y’uko aba bacanshuro binjira mu Rwanda babanje gusakwa na Polisi y’u Rwanda ndetse bamwe muri bo basanganywe imishadiko y’amadorali ya Leta Zunze Ubumwe z’Amerika dore ko na M23 ivuga ko Kinshasa yazanye aba bacanshuro “bahembwa amadolari ibihumbi buri kwezi” mu gihe abasirikare ba leta “bahembwa amadolari macye atuma imibereho yabo ikomeza kuba mibi”, bavuga ko ari ikimenyetso cy’imiyoborere mibi barwanya.
