Ikipe ya Newcastle United yaraye yegukanye igikombe cya Carabao Cup itsinze Liverpool ibitego 2-1 ku mukino wa nyuma, kiba igikombe cya mbere yegukanye kuva mu 1969 ubwo yegukanaga igikombe cya The Old Fairs Cup.
Newcastle United y’umutoza Eddie Howe ibifashijwemo na Dan Burn ku munota wa 45 na Alexander Isak ku munota wa 53 yabashije kwegukana igikombe yikuye imbere ya Liverpool ya Arne Slot yatsindiwe igitego cyayo rukumbi na Federico Chiesa mu minota y’inyongera y’umukino.
Iki gikombe Newcastle United yegukanye kibaye icya mbere itwaye kuva mu 1969, bivuze ko hari hashize imyaka 56 idatwara igikombe icyo aricyo cyose gusa igikombe cyo mu gihugu imbere yaherukaga gutwara ni FA Cup yo mu 1955 ubwo yatsindaga Manchester City ibitego 3-1 ku mukino wa nyuma, bivuze ko hari hashize imyaka 70 idatwara igikombe cyo mu gihugu imbere.
Ku ruhande rwa Liverpool, ijoro ryabaye ribi ndetse ahubwo icyumweru kiba kibi kurushaho kuko yaherukaga no gusezerwa na Paris Saint Germain muri UEFA Champions League ku wa kabiri tariki 11 Werurwe 2025.
Kuri ubu Liverpool isigaye ihatanira igikombe kimwe cya Shampiyona y’Ubwongereza, ikaba ari nacyo ifite amahirwe menshi yo gutwara kuko iyoboye urutonde rwa shampiyona ndetse ikaba irusha Arsenal ya kabiri amanota 12, hakaba habura imikino 9.