Amakipe ya APR VC mu bagabo n’abagore niyo yegukanye ibikombe mu mikino y’Akarere ka Gatanu (Zone 5) yaberaga i Kampala mu Bugande kuva tariki 27 Gashyantare 2025.
Mu bagabo, APR VC yegukanye igikombe itsinze Police VC nayo yo mu Rwanda amaseti 3-1. Iyi Police VC ikaba ariyo yarifite igikombe giheruka cyabereye mu Rwanda muri 2023.
Umwanya wa gatatu wegukanywe na REG VC yari yakuwemo na APR VC itsinze Sport-S yo mu Bugande amaseti 3-1.
Mu bagore, APR WVC yegukanye igikombe itsinze Pipeline VC yo muri Kenya yarifite igikombe giheruka amaseti 3-1.
Umwanya wa gatatu wegukanywe na Sport-S yo mu Bugande yakuwemo na Pipeline itsinze KCB-Nkumba nayo yo mu Bugande amaseti 3-2.
Ni ku nshuro ya gatatu iyi mikino y’Akarere ka 5 ya volleyball yariteguwe. Bwa mbere yabaye muri 2019 yegukanwa na Gisagara VC, ubundi iba muri 2023 yegukanwa na Police VC mu bagabo na Pipeline mu bagore.
Kuri iyi nshuro, amakipe 11 niyo yitabiriye iri rushanwa mu bagabo harimo amakipe atatu yo mu Rwanda ariyo REG VC, APR VC na Police VC n’amakipe arindwi y’abagore harimo imwe yo mu Rwanda ariyo APR WVC.
Inama itegura irushanwa yabaye tariki 26 Gashyantare 2025 naho imikino itangira tariki 27 Gashyantare, isozwa kuri uyu wa mbere tariki 3 Werurwe 2025 muri Lugogo Indoor Stadium i Kampala.