Igitaramo umuhanzikazi wo muri Nigeria Tems yari gukorera mu Rwanda muri BK Arena tariki 22 Werurwe 2025 cyasubitswe.
Kuri uyu wa kane tariki 30 Mutarama 2025 nibwo Temilade Openiyi wamenyekanye mu muziki nka Tems yanditse ku rubuga rwe rwa X ko icyatumye iki gitaramo gisubikwa ari ukubera amakimbirane amaze iminsi hagati ya Leta y’u Rwanda na Repubulika Iharanira Demokarasi ya Congo.
Mu butumwa bwe yagize ati,”Mu bihe bya vuba nateguye igitaramo mu Rwanda ntazi ko hari amakimbirane ari hagati y’u Rwanda na Repubulika Iharanira Demokarasi ya Congo. Sinshobora na rimwe kwirengagiza ibibazo by’isi nkana, kandi nsabye imbabazi niba ari gutyo bigaragaye. Ntagitekerezo narimfite ku biri kuba.”
Tems yakomeje agira ati,”Nifatanyije n’abari kugirwaho ingaruka. Intambara/amakimbirane ntabwo ari imikino kandi ndasengera amahoro muri iki gihe.”
Tems ni umuhanzikazi wo muri Nigeria w’imyaka 29 y’amavuko, yatangiye umuziki muri 2018 mu njyana ya Afrobeat, R&B na Alté.
Tems yari gukorera igitaramo i Kigali nk’umwe mijyi yo ku isi ari kuzengurukamo akora ibitaramo bigamije kumenyekanisha album ye nshya yise ‘Born in the Wild’ iriho indirimbo 19.
Tems akaba yaratangiye gukora ibi bitaramo tariki 11 Kamena 2024.
Zimwe mu ndirimbo zatumye Tems akundwa cyane harimo ‘Wait for you’ yakoranye na Drake, ‘Love Me JeJe’, ‘Essence’ yakoranye na Wizkid n’izindi.
